छठि पर बिहार जाएबला लोकक लेल राहत, दिल्ली सरकार चलाओत बस

नई दिल्ली । समदिया

दीपावली आ छठि महापर्वसँ पहिने दिल्लीमे रहनिहार बिहारक लोकक लेल राहतक खबरि अछि। दिल्ली सरकार दिल्ली आ बिहारक बीच अंतरराज्यीय बस सेवा शुरू करबाक तैयारी तेज कएने अछि। शुरुआती चरणमे 2-3 चुनिंदा मार्ग पर बस चलाओल जाएबाक योजना अछि।

परिवहन विभाग प्रस्तावित पारस्परिक परिवहन समझौताक संबंधमे भेटल सुझाव पर अंतिम रिपोर्ट तैयार करबाक लेल एकटा कमिटी गठित कएने अछि। कमिटीकेर रिपोर्टक बाद बसक मार्ग, किराया, संख्या आ संचालनक तिथि तय होएत।

सरकार दिल्लीसँ बिहारक विभिन्न शहरकेँ जोड़बाक लेल 18 मार्ग चिह्नित कएलक अछि। प्रस्तावित मार्गमे पटना, बिहारशरीफ, अररिया, भागलपुर, बक्सर, दरभंगा, पूर्वी चम्पारण, गयाजी, किशनगंज, मधुबनी, मुजफ्फरपुर आ नवादा शामिल अछि। दिल्लीसँ पटनाक लेल चारि मार्ग प्रस्तावित अछि, जकर दूरी करीब 1,045 सँ 1,182 किलोमीटर धरि अछि।

प्रस्तावित समझौतामे CNG आ इलेक्ट्रिक बसक संचालनक प्रावधान अछि। डीजल बस लेल BS-VI अथवा ओकरासँ नव उत्सर्जन मानकक पालन आवश्यक होएत। फिलहाल दिल्ली-बिहारक बीच सरकारी बस सेवा नहि चलैत अछि, हालांकि निजी बस सेवा उपलब्ध अछि।

सरकारक प्रयास अछि जे दीपावली आ छठिसँ पहिने कम-सँ-कम 2-3 मार्ग पर बस सेवा शुरू कए देल जाए। हालांकि अंतिम मार्ग, किराया आ संचालनक तिथि कमिटी रिपोर्ट आ दुनू राज्यक बीच होबयवला समझौताक बाद स्पष्ट होएत।