विश्व विरासत दिवस आइ पटना स्थित विद्यापति भवनमे होएत आयोजित
पटना । समदिया
मैथिली साहित्य संस्थान, इन्टैक पटना चैप्टर एवं चेतना समितिक संयुक्त तत्वावधानमे आइ 18 अप्रैलकें पटनाक विद्यापति पथ स्थित विद्यापति भवनमे धरोहर संरक्षणसँ संबंधित अनेक कार्यक्रम आयोजित होमय जा रहल अछि।
चेतना समितिक अध्यक्ष विवेकानंद झाक अनुसार एहि अवसर पर नदी प्रधान मिथिला केर प्राकृतिक धरोहर लखनदेई नदीक उद्धार पर बनल एकटा लघु फिल्म रिलीज कएल जायत। लखनदेई नदी करीब चालीस साल पहिने अपन धारा बदलि कs भटकि गेल छल जाहि कारणे एकटा बहुत पैघ क्षेत्रमे जल जमाव भs जाइत छल आ तैंs खेती बारीक काज केर बहुत नोकसान भs जाइत छल। दोसर दिशि लखनदेई नदीक पुरान धारा सूखि जेबाक कारणे करीब एक्कइस किमी धरि अतिक्रमण भs गेल आओर ओहि भूमि पर खेती होमय लागल छल।
सीतामढ़ी केर किछु धरोहर प्रेमी सभक द्वारा राम शरण अग्रवालक नेतृत्वमे ‘लखनदेई बचाओ अभियान समिति’ गठित कs आठ साल धरि विभिन्न स्तर पर भरिसक प्रयास कएल गेल। अंततः राज्य सरकार द्वारा ओहि एक्कइस किमी धरि पुरनका धाराकें खोधि कs नदीकें पुनर्जीवित कएल गेल। आब लखनदेई नदी नेपालसँ मुजफ्फरपुर जिलाक कटरा धरि आबि बागमती नदीमे मिल जाइत अछि ।
इन्टैक पटना चैप्टरक कन्वेनर भैरव लाल दास कहलन्हि कि लखनदेई नदीकें पुनर्जीवित करबाक भगीरथ प्रयासक कथानक पर मैथिली साहित्य संस्थान द्वारा एकटा लघु फिल्मक निर्माण कराओल गेल अछि। विश्व विरासत दिवसक अवसर पर एहि फिल्मकें रिलीज कएल जाएत।
मिथिला भारतीक संपादक डॉ. शिव कुमार मिश्रक अनुसार एहि अवसर पर मिथिलाक सांस्कृतिक धरोहर पर आधारित मैथिली साहित्य संस्थानक अंतरराष्ट्रीय शोध पत्रिका ‘मिथिला भारती’ केर बारहम भागक विमोचन सेहो कएल जाएत। एहिमे मैथिली भाषा केर प्राचीन इतिहास, मिथिलासँ प्राप्त पुरावशेष, स्वतंत्रता सेनानी, मिथिलाक इतिहास एवं पुरातत्व आदिसँ संबंधित शोध पत्र प्रकाशित कएल गेल अछि।
