प्रधानमंत्री नरेन्द्र मोदी रविदिन अपन मासिक रेडियो कार्यक्रम ‘मन की बात’क ११०म कार्यक्रममे राष्ट्रकेँ सम्बोधित कयलनि। प्रधानमंत्री महिला दिवसक उल्लेख कयलनि, जे ८ मार्चकेँ मनाओल जाइत अछि। ओ कहलनि जे ई विशेष दिन देशक विकास यात्रामे नारी शक्तिक योगदानकेँ नमन करबाक अवसर अछि।
प्रधानमंत्री कहलनि जे आइ भारतक नारी शक्ति हर क्षेत्रमे प्रगतिक नव ऊँचाइ छू रहल अछि। के सोचने होयत जे हमर गाममे रहनिहार महिला सभ सेहो ड्रोन उड़ाओत, मुदा आइ ई संभव अछि। आइ गाममे ड्रोन दीदीक चर्चा अछि, नमो ड्रोन दीदीक नाम सबहक जुबान पर अछि।
एहि दौरान प्रधानमंत्री उत्तर प्रदेशक सीतापुरमे रहनिहार नमो ड्रोन दीदी सुनीता देवीसँ बात कयलनि। प्रधानमंत्री सुनीता देवीसँ पुछलखिन जे ओ ‘ड्रोन दीदी’ कोना बनलीह, हुनका कतऽ आ कोना प्रशिक्षित कयल गेलनि। सुनीता प्रधानमंत्रीकेँ कहलनि जे ओ फूलपुर इलाहाबाद केन्द्रसँ प्रशिक्षण प्राप्त कयलनि अछि। प्रधानमंत्री सुनीतासँ पुछलखिन जे की ओ ड्रोनक बारेमे पहिने सुनने छलीह। सुनीता बतौलनि जे ओ सबसँ पहिने सीतापुरक कृषि विज्ञान केन्द्रमे ड्रोन देखलनि। सुनीता देवी प्रधानमंत्रीकेँ कहलनि जे प्रशिक्षणक क्रममे हुनका सबसँ पहिने थ्योरी सिखाओल गेल आ ड्रोनक विषयमे कहल गेल। एकर बाद हुनकर टेस्ट लेल गेल आ फेर ड्रोन उड़ाबय केर प्रेक्टिकल ट्रेनिंग सेहो देल गेल।
सुनीता बतौलनि जे फसल पैघ भेला पर खेतमे जेनाइ मुश्किल होइत अछि आ बरसातक मौसममे सेहो। एहन स्थितिमे ड्रोनक मददसँ खेतमे दवाई केर छिड़काव कयल जा सकैत अछि। ओ बतौलनि जे एखन धरि ओ ३५ एकड़ फसलमे ड्रोनक माध्यमसँ दवाईक छिड़काव कऽ चुकल छथि। सुनीता प्रधानमंत्रीकेँ कहलनि जे पहिने जाहि काजमे कतेको घंटा लगैत छल, आब मात्र ३० मिनटमे पूरा भऽ जाइत अछि।
प्रधानमंत्री कहलनि जे आइ देशमे एहन कोनो क्षेत्र नहिं अछि जतय महिला शक्ति पाछू रहि गेल अछि। प्रधानमंत्री मोदी कहलनि जे महिला लोकनि प्राकृतिक खेती, जल संरक्षण आ स्वच्छताक क्षेत्रमे सेहो उत्कृष्ट काज कयलनि। प्रधानमंत्री कहलनि जे केमिकलसँ हमर धरती माताकेँ कष्ट पहुँचल अछि। मुदा आब धरती माताकेँ बचाबयमे मातृ शक्ति पैघ भूमिका निभा रहल अछि। ओ प्राकृतिक खेतीक विस्तार कए रहल छथि।
ओ जल संरक्षणमे जल समितिसभक भूमिकाकेँ सेहो महत्वपूर्ण बतौलनि। प्रधानमंत्री मोदी महाराष्ट्रक कल्याणी प्रफुल्ल पाटिलसँ सेहो बात कयलनि। कल्याणी माइक्रोबायोलॉजीमे एमएससी कयलनि अछि। कल्याणी प्रधानमंत्रीकेँ सूचित कयलनि जे ओ १० प्रकारक प्राकृतिक वनस्पति एकत्र कऽ पेस्टिसाइड अर्थात कीटनाशकक विकल्प तैयार कयलनि अछि। एहि विधिक कारणेँ सबसँ कम रासायनिक कीटनाशकक उपयोग कयल जा रहल अछि। एहिसँ खतरनाक कीटनाशकक पानिमे घुलि जयबाक कोनो खतरा नहिं अछि आ लोकक जीवन सुरक्षित रहैत अछि।
प्रधानमंत्री कल्याणीसँ जल संरक्षणक विषयमे पूछलनि, जाहि पर ओ कहलनि जे गामक सभ भवन जेना स्कूल, आंगनबाड़ी, पंचायत घरमे रेन वाटर हार्वेस्टिंग अर्थात वर्षा जल संचयनक व्यवस्था कयल गेल अछि, जाहि कारणेँ बरखाक पानि फेरसँ जमीनमे चलि जाइत अछि। ओ प्रधानमंत्रीकेँ सूचित कयलनि जे गाममे एखन धरि २०टा वाटर रिचार्ज अर्थात जल पुनर्भरण बनायल जा चुकल अछि आ ५० टा नव जल पुनर्भरणक व्यवस्था कयल जा रहल अछि।
प्रधानमंत्री मोदी कहलनि जे अलग-अलग क्षेत्रमे देशक नारी शक्तिक सफलता बहुत प्रेरक अछि। ओ कहलनि कि हम नारी शक्तिक स्पिरिट केर हृदयसँ सराहना करैत छी।
