प्रधानमंत्री नरेन्द्र मोदी मंगलसँ संयुक्त अरब अमीरातक दू दिवसीय यात्रापर रहताह। प्रधानमंत्री कहलनि जे ओ प्रवासी भारतीय लोकनिक प्रयाससँ प्रभावित छथि। भारतीय प्रवासीक प्रयासक परिणामस्वरूप आइ शेष दुनियाक राष्ट्रीय राजधानी दिल्लीसँ प्रगाढ़ सम्बन्ध अछि।
प्रधानमंत्री कहलनि जे ओ ‘हैलो मोदी’ कार्यक्रममे प्रवासी भारतीय लोकनिसँ भेंट करबाक लेल उत्सुक छथि।
संगहि पीएम मोदी अपन एक्स अकाउंटमे ३५ लाख भारतीय समुदायसँ जायद स्पोर्ट्स सिटीमे आयोजित ‘अहलान मोदी कार्यक्रम’मे भाग लेबाक अपील कयलनि। ई सातम बेर अछि जखन पीएम मोदी खाड़ी देशक दौरा कऽ रहल छथि।
प्रधानमंत्री कहलनि “हम राष्ट्रीय राजधानी दिल्लीसँ शेष दुनियाक सङ्ग सम्बन्धकेँ प्रगाढ़ करबामे भारतीय प्रवासीक प्रयासक सराहना करैत छी। आइ साँझ हम ‘अहलान मोदी कार्यक्रम’मे भाग लेब जतय पैघ संख्यामे एनआरआई रहताह। एहि विशेष अवसर पर अहां सेहो शामिल भऽ सकैत छी।”
ओतहि मोदी अपन एक्स हैंडल पर लिखलनि, “अहलान मोदीक वालंटियर्स सभकेँ सलाम। पूरा दिन पूर्वाभ्यासक अछैतो ओ अपन घरमे अभ्यास कऽ रहल छथि। एहि विशेष अवसर पर बहुत उत्साह देखल जा रहल अछि।”
स्थानीय मीडिया रिपोर्टक अनुसार, अबू धाबी आ संयुक्त अरब अमीरातक आसपास भारी बरखाक सम्भावनाक कारण प्रधानमंत्रीक कार्यक्रमक अवधि कम कऽ देल गेल अछि। एकर अतिरिक्त कार्यक्रममे आबयवला लोकक संख्या सेहो कम कऽ देल गेल अछि।
कार्यक्रममे भाग लेलाक बाद प्रधानमंत्री अबू धाबीमे पहिल हिन्दू मन्दिरक उद्घाटन करताह। ज्ञातव्य जे ई मन्दिर २७ एकड़ जमीनमे बनल अछि।
२०१५ मे अबू धाबीक क्राउन प्रिंस आ संयुक्त अरब अमीरात सशस्त्र बलक उप सर्वोच्च कमांडर शेख मोहम्मद बिन जायद अल नाहयान मन्दिरक निर्माणक लेल १३.५ एकड़ जमीन देलनि।
ओतहि वर्ष २०१८ मे प्रधानमंत्री मोदी दुबई ओपेरा हाउस दिससँ वीडियो कॉन्फ्रेंसिंगक माध्यमसँ मन्दिरक शिलान्यास कयलनि। एकर बाद मई २०२३ मे ३० देशक राजनयिक सेहो निर्माणाधीन मन्दिरक दर्शन कयलनि।
आगा मोदी संयुक्त अरब अमीरातक राष्ट्रपति शेख मोहम्मद बिन जायद अल नाहयानक सङ्ग देशक बीच सम्बन्धकेँ प्रगाढ़ करबाक तरीकापर द्विपक्षीय वार्ता करताह। व्यापक परामर्श होएत।
एकर अतिरिक्त प्रधानमंत्री ‘वर्ल्ड गवर्मेंट समिट २०२४’ मे विशिष्ट अतिथिक रूपमे भाग लेताह।
