दिल्ली दिसि मार्च करबाक अभियानक दौरान किसान संगठनक सङ्ग वार्ता करबाक लेल चण्डीगढ़क दौरा कयनिहार केन्द्रीय कृषि मंत्री अर्जुन मुण्डा कहलनि अछि जे भारत सरकार किसानक हितक रक्षाक लेल प्रतिबद्ध अछि, भारत सरकार किसानक सङ्ग वार्ताक लेल सदैव तैयार अछि मुदा राज्य सरकारसँ कतेको मुद्दा पर चर्चा करय पड़त आ एकरा लेल एकटा फोरम बनबय पड़त।
मुंडा किसान संगठनसभसँ आम लोकक सेहो देखभाल करबाक आग्रह कयलनि आ कहलनि जे हुनका सभकेँ ई ध्यान रखबाक चाही जे आम आदमीकेँ कोनो कठिनाईक सामना नहिं करय पड़य।
दिल्लीमे मीडियासँ बातचीत करैत अर्जुन मुण्डा कहलनि जे सरकार हुनका (किसान संगठन) सङ्ग वार्ताक लेल सदैव तैयार अछि आ एहि मुद्दाक समाधान मात्र वार्ताक माध्यमसँ कयल जा सकैत अछि।
ओ कहलनि जे सरकार पूरा मुद्दाकेँ वार्ताक माध्यमसँ सुलझाबय चाहैत अछि, तेँ जखन ई मुद्दा उठल तखन केन्द्रीय मंत्री पीयूष गोयल, नित्यानन्द राय आ ओ स्वयं किसान संगठनक सङ्ग बातचीत करबाक लेल चंडीगढ़ गेलाह।
मुंडा आगू कहलनि जे भारत सरकारक स्तर पर जे किछु कएल जा सकैत अछि ओ सरकार द्वारा कयल जा रहल अछि आ किसान संगठनकेँ सेहो एकरा बारेमे कहल गेल अछि, मुदा बहुत रास मुद्दा राज्य सरकारसँ जुड़ल अछि, जाहि पर भारत सरकारक राज्य सरकारसँ चर्चा करय पड़त। अतः एहि सभ मुद्दाक समाधानक लेल एकटा तरीका निकालय पड़त आ ओहि लेल समय चाही।
कांग्रेस सहित अन्य विपक्षी नेताक बयान पर प्रतिक्रिया दैत केंद्रीय मंत्री आगू कहलखिन जे हमरा किसानक हितक प्रति बेसी चिंता रखबाक अछिइ, एहि पर के राजनीति कय रहल अछि, ताहि केर पाछू हमरा भागय केर नहिं अछि।
