आगामी १४ फरवरीकें ज्ञानक देवी एवम् बुद्धि-विवेकक देवी भगवती शारदाक पूजनोत्सवक विलक्षण तैयारीक अंतिम रूपरेखा निर्धारित करबाक लेल मिथिला नवजीवन समिति ट्रस्ट, उल्लासनगर द्वारा कार्यकारिणी समितिक महत्वपूर्ण बैसार आयोजित कयल गेल। बैसारक अध्यक्षता प्रमोद कर्ण कयलनि। समितिक सचिव विमल झा सरस्वती पूजनोत्सवक सम्पूर्ण व्यवस्थाकें सुचारू रूप सँ संचालन हेतु विस्तारपूर्वक कार्ययोजनाकें जानकारी दैत बतौलनि जे पूर्व वर्षक भाँति एहुँ वर्ष अत्यन्त श्रद्धा तथा उत्साहपूर्वक भगवतीक पूजन-अर्चन सम्पन्न होयत। विदित हो कि भगवती शारदाक भव्य विग्रह मंदिर परिसरमे प्रतिष्ठित छथि। बारहो महिना भगवतीक शास्त्रोक्त पूजन कय समस्त मानव समाजक कल्याणक अर्चन कयल जाइत अछि।
१४ फरवरी २०२४ पूजनोत्सवक दिन नवचंडी महायज्ञ एवम् षोडशोपचारक संग पूजनोत्सव प्रारम्भ होयत। हवनादिक उपरांत प्रसाद वितरण, सांस्कृतिक कार्यक्रमक भव्य आयोजन होयत। दोसर दिन अर्थात १५ फरवरीकें सकल पूजनोत्सव विधान सम्पन्न कयला उपरांत सायंकाल सुन्दरकाण्ड परायण केर पश्चात महाभंडाराक आयोजन कयल गेल अछि। मिथिला नवजीवन समिति ट्रस्टक सचिव विमल झा जनतब देलनि जे पूजनोत्सवक सफल आयोजनक लेल ट्रस्टक कार्यकर्तामे असीम उत्साह व्याप्त अछि। बैसारमे ट्रस्टक कोषाध्यक्ष ललन सिंह, कौशल झा, जय किशोर झा, साहेब जी, आनन्द झा, सुजीत, उज्जवल, मुकेश समेत अनन्य उपस्थित छलाह एवं सब अपन अपन बिचार रखैत ई भरोसा देलैन जे ट्रस्टक गरिमाक अनुकूल कार्यक्रमक सफल बनायब ।
