पश्चिम बंगाल विधानसभाक 152 सीट पर आइ मतदान, अमित शाहक हुगलीमे हुंकार
हुगली। समदिया
पश्चिम बंगाल विधानसभाक 294 सीटक लेल आइ प्रथम चरणक मतदान होयत। पाहिले चरणमे 23 अप्रैल यानी आइ 152 सीट पर वोट डालल जायत। जखनि कि 29 अप्रैलकेँ 142 सीट पर वोटिंग होयत। ओतय तमिलनाडुक सभ 234 सीट पर 23 अप्रैलकेँ एक चरणमे मतदान होयत। आब भारतीय जनता पार्टीक फोकस दोसर फेजक सीट पर होयत। योगी आदित्यनाथ, अमित शाह जँका बीजेपीक पैघ नेता 22 अप्रैलकेँ बंगालमे कतेको रैलीकेँ संबोधित कयलनि। हालांकि, जनताक फैसला तय करत कि बंगालमे ‘दीदी’क राज जारी रहत वा ‘परिवर्तन’ आयत। ओतय, तमिलनाडुमे ‘ड्राविड़ मॉडल’ मजबूत होयत वा नव सितारा चमकत। जनतब जे विधानसभा चुनावक नतीजा 4 मईकेँ घोषित होयत।
केंद्रीय गृहमंत्री आ भाजपा नेता अमित शाह पश्चिम बंगालक दम-दम उत्तर विधानसभा क्षेत्रमे चुनावी रैलीकेँ संबोधित करैत काल्हि ममता बनर्जी सरकार पर तीखा हमला कयलनि आ भाजपाक जीतक वादा कयलनि। अमित शाह कहलनि, भाजपाक सरकार बनत, हम राज्यमे समान नागरिक संहिता लागू करब। ट्रिपल तलाक खत्म होय आ चारि शादीक प्रथा सेहो बंद होयत।
पश्चिम बंगालक हुगलीमे बुधदिन प्रचार करय वला गृहमंत्री अमित शाह एकटा अनोखा शैलीक प्रदर्शन कयलनि। रैली स्थल पर लोकसँ बातचीत करैत देखल गेलाह आओर भाजपाकेँ वोट देबय लेल आग्रह करैत देखल गेलाह। हुगलीकेँ सप्तग्राममे प्रचारक बाद गृहमंत्री भीड़ लग पहुंचल आ महिलाक भलाईक बारेमे पूछताछ कयलनि। शाह पुछलनि, “अहाँ सभ ठीक छी की?” ओ कहलनि जे, सत्तामे एलाक बाद भाजपा महिलाक तीन हजार रुपया महीना देत। “अहाँ फॉर्म भरने छी की?” महिला सभ जबाब देलनि, “हँ, हम सभ फॉर्म भरि लेने छी।” अमित शाह तखन पुछलखिन, “की अहाँ ममता बनर्जी सरकारसँ मुक्त होबय चाहैत छी?” सभ कियो जबाब देलक, “हँ।” अमित शाह तखन “जय श्री राम” केर नारा लगा कय विदा भ गेलाह।
वीडियो शेयर करैत गृहमंत्री अमित शाह इंस्टाग्राम पर लिखलनि जे बंगालमे कमल खिलय लेल तैयार अछि।
जनसभाकेँ संबोधित करैत गृहमंत्री कहलनि, अहाँ भाजपाक सरकार बनाउ आ मोदीक हाथ मजबूत करू। छोट बच्चीकेँ सेहो रातिमे स्कूटर पर असगरे निकलयमे सक्षम प्रदेश बनायब आ सुनिश्चित करब जे कोनो गुंडा ओकरा दिस तकबाक हिम्मत नहि करय।
घुसपैठियाक मुद्दा पर अमित शाह कहलनि जे सीमा पर बाड़ लगेबाक जरूरत अछि, मुदा ममता एहि लेल जमीनक इंतजाम नहि करैत छथि। बीएसएफ कए सीमाक बाड़ लगेबा लेल 600 एकड़ जमीनक जरूरत अछि। भाजपा सरकार चुनू आ हम अहाँकेँ विश्वास दिलाबैत छी जे हम सभ 45 दिनक भीतर सीमा पर बाड़ लगा देब। घुसपैठिया नौकरी छीन रहल अछि, गरीबक लेल बनल संसाधनक दुरुपयोग कय रहल अछि आ देशक आंतरिक सुरक्षा पर खतरा मंडरा रहल अछि।
ओ कहलनि जे, ममता घुसपैठियाकेँ सुरक्षाक कतबो कोशिश करथि, हम सभ ई सुनिश्चित करब जे हुनक पहिचान भ जाय आ बंगालसँ बहार कय देल जाय।
