तीन टा वाहन पर बेसी मात्रामे लादल लाइटर, तेल सङ्ग दू टा चालक गिरफ्तार

एसएसबी 48वीं वाहिनी कमला सीमा चौकी जयनगरक जवान गुप्त सूचना पर कयलक कार्रवाई

*

मधुबनी समदिया

*

भारत-नेपाल सीमा पर तैनात एसएसबी 48वीं वाहिनी जयनगरक कार्यक्षेत्रमे कमला सीमा चौकीक जवान सभकेँ एकटा पैघ सफलता भेटलैक अछि। भेटल गुप्त सूचना पर तत्क्षण कार्रवाई करैत सीमा चौकी प्रभारी निरीक्षक मुकेश खतोंबरियाक नेतृत्वमे विशेष नाका गश्ती दलक जवान सभ रवि दिन सीमा स्तंभ संख्या 270/15 सँ लगभग 3.1 किलोमीटरक दूरी पर भारतीय क्षेत्रमे 2 टा तस्करकेँ अवैध रूपसँ तीन मालवाहक वाहन पर नेपालसँ भारत लायल जा रहल अवैध समानक सङ्ग गिरफ्तार कयलक अछि। जखनि कि एकटा वाहनकेँ चालक वाहन सङ्ग समान छोड़ि नेपाल दिस भागयमे सफल रहल।

जब्त समानमे 56 डिब्बा इपिक विंड प्रूफ लाइटर यानि 56 हजार नग लाइटर, दोसर वाहनमे बर्निस लाइटर 71 डिब्बा यानि 71 हजार लाइटर आर 150 ग्राम वजन वला 66 डिब्बा क्लोजअप टूथपेस्ट यानि 4752 नग, 50 एमएलकेँ 426 डिब्बा इंदुलेखा बृंघा केस तेल यानि 15,336 नग सामग्री जब्त कयलक। सँगहिं एकटा टाटा योद्धा पिकअप आर दू टा बोलेरों पिकअप जब्त कयलक। एकर अलावा दू टा तस्करकेँ गिरफ्तार कयलक अछि। गिरफ्तार तस्करक पहिचान मधुबनी जिलाक खिरहर थाना क्षेत्रक बौरहर गामक झूलन पासवान केर पुत्र शिव कुमार पासवान आर हिसार गामक मो. यूनुस केर पुत्र मो. सद्दाम हुसैनकेँ रूपमे कयल गेल अछि।

कागजी कार्रवाई पूर्ण कयलाक उपरांत जब्त समान, वाहन आर गिरफ्तार तस्करकेँ अग्रिम कार्यवाही लेल सीमा शुल्क कार्यालय जयनगरकेँ सौंप देल गेल।