राष्ट्रीय राजधानी दिल्लीमे दिल्ली आई.टी.ओ. स्थित संस्कार भारतीमे संपन्न भेल मैथिली साहित्य महासभाक अध्यक्ष पदक चुनाव
संचालित मैथिलीक प्रसिद्ध साहित्यिक एवं सांस्कृतिक संस्था मैथिली साहित्य महासभा अर्थात् मैसामक आंतरिक कार्यकारिणीक चुनाव रवि दिन संपन्न भेल। जाहिमे वर्तमान अध्यक्ष सुनीत ठाकुरकेँ हरा क’ राहुल झा अध्यक्ष पद पर निर्वाचित भेलाह। ओ एहि पदक लेल भेल रोमांचक त्रिकोणीय मुकाबलामे अपन निकटतम प्रतिद्वंदी संजीव सिन्हा आ सुनीत ठाकुरकेँ क्रमशः एक आ दू भोटसँ परास्त क’ विजय प्राप्त कयलनि।
जनतब दी जे अध्यक्ष पदक लेल कुल पड़ल २७ गोट भोटमे सँ सभ सँ बेसी १०टा भोट राहुल झा केँ भेटल। जखन कि संजीव सिन्हा आ वर्तमान अध्यक्ष सुनीत ठाकुरकेँ क्रमशः नौ गोट आ आठ गोट भोटसँ संतोष करय पड़ल। त’ महासचिवक पद पर केशव झा एवं सोनी चौधरी तथा कोषाध्यक्षक पद पर आशीष नीरज पहिनहिं निर्विरोध निर्वाचित भ’ चुकल छथि। चुनाव अधिकारी टी. एन झाक नेतृत्वमे कार्यकारिणीक निर्वाचनसँ संबंधित सभ औपचारिकता पूर्ण कयल गेल।
सभकेँ ज्ञात अछि जे मैथिली भाषाक संरक्षण आ संवर्धनक लेल वर्ष २०१५ मे स्थापित दिल्लीक अग्रणी साहित्यिक- सांस्कृतिक संस्था मैथिली साहित्य महासभा अपन छोट कार्यकालमे मारिते रास साहित्यिक एवं सांस्कृतिक कार्यक्रम आयोजित क’ कीर्तिमान स्थापित कयलक अछि। जाहिमे अंतर्राष्ट्रीय मातृभाषा दिवसक अवसर पर सभ साल साल २१ फरवरीकेँ वार्षिक संगोष्ठी, सितम्बर मासमे ‘एकल व्याख्यानमाला’ सहित विराट कवि सम्मेलनक आयोजन आ साहित्य वार्षिकी ‘अपूर्वा’क प्रकाशन प्रमुख अछि। एकर अतिरिक्त मैथिली भाषामे उत्कृष्ट रचना करय वला युवा साहित्यकारकेँ लेखनमे प्रोत्साहित करबाक लेल सभ बरख मैसाम युवा सम्मान सेहो प्रदान कयल जाइत रहल अछि।
