एहिसँ पहिने २५ जूनकेँ पत्रकार शिवशंकर झाक निर्मम चाकू मारि हत्या कऽ देल गेल छल। शिवशंकरक हत्या घर लग अपराधीसभ द्वारा कयल गेल छल। ओहि मामिलामे पुलिस दूटा लोककेँ गिरफ्तार कऽ जेल पठा देने छल।
बिहारक मुजफ्फरपुरमे यूट्यूबर पत्रकार गौरव कुशवाहा गाछसँ लटकल भेटल। परिवारक सदस्यकेँ गौरवक हत्याक आशंका अछि। तुर्कीक पुलिस स्टेशन प्रमुख प्रमोद सिंह कहलनि जे शव आमक गाछसँ लटकल भेटल छल। शवक पहिचान गामक गौरवक रूपमे भेल अछि। प्रथम दृष्टया ई हत्याक मामिला प्रतीत होइत अछि। शवकेँ पोस्टमार्टम लेल एसकेएमसीएच पठाओल गेल अछि। अपराधीकेँ जल्दिये गिरफ्तार कए लेल जाएत।
प्राप्त जानकारीक अनुसार मंगलदिन भोरे तुर्की थाना क्षेत्रक छाजन खरियार गाममे यूट्यूबरक शव भेटल। संदिग्ध स्थितिमे भेटल शवकेँ देखैत बुझाइत अछि जे युवककेँ मारलाक बाद कियो ओकर शव गाछसँ लटका देलक।
परिवार गामेक किछु लोकपर हत्या कय शवकेँ गाछसँ लटका देबय केर आरोप लगओलक अछि। पुलिस मामिलाक जांच कए रहल अछि।
सोमकेँ राति छाजन गामक निवासी उमेश लाल भगतक बेटा गौरव भोजन कए सुतय चलि गेल छल। राति लगभग ११ बजे हुनका एकटा अनजान नम्बरसँ मोबाइल पर फोन आयल, जकर बाद ओ अपन माय इंदल देवीकेँ जल्दिये अयबाक लेल कहि चलि गेलाह। बहुत समय बादो जखन गौरव घर नहिं घुरल तखन परिवार हुनका ताकय लागल। मंगलदिन भोरे, गामक लोक गौरवक शव घरक लग आमक गाछसँ लटकल देखलक।
गामक लोकक सूचना पर परिवार हड़बड़ाइत घटनास्थल पर पहुँचि गेल। मृत शरीरकेँ देखि परिवारमे हाहाकार पसरि गेल। मृतकक माय बेचैनीसँ कानि रहल छलथि। पुलिस घटनास्थलसँ गौरवक मोबाइल, गमछा आ चप्पल जब्त कयलक। मृतकक माय इंदल देवी बतौलनि जे गामक किछु लोक गौरवकेँ धमकी देने छलाह जे ओ ओकरा मारि देत। कोर्टमे शिकायत सेहो कएल गेल छल। एहि मामिलाक सूचना पुलिसकेँ सेहो देल गेल मुदा कोनो कारवाई नहिं कयल गेल।
