बीजेपी केर १२ आ जदयू केर ९ विधायक लेलनि शपथ
जातीय समीकरणक राखल गेल पूरा ख्याल
*
पटना
*
बिहारक नीतीश कुमार सरकारक कैबिनेट विस्तार भेल। शपथ ग्रहण समारोह शुक्र कऽ राजभवनमे साँझ ६.३० बजे भेल। कतेको विधायककेँ मुख्यमंत्री कार्यालयसँ फोन आयल। जानकारीक अनुसार नीतीश कुमार जेडीयू नेता आ पूर्व मंत्री मदन सहनीकेँ फोन कयलनि अछि। एकर संगहि भाजपा एमएलसी दिलीप जायसवाल आ जदयू विधायक आ पूर्व मंत्री लेसी सिंह, जदयू विधायक आ पूर्व मंत्री शीला मंडल, जदयू विधायक आ पूर्व मंत्री रत्नेश सदाकेँ सेहो नीतीश कुमार फोन कयलनि अछि।
नीतीश कुमारक सरकारमे भाजपाक १२ गोट मंत्री शपथ लेलनि। एहिमे नितिन नवीन, कृष्णनंदन पासवान, जंक राम, मंगल पाण्डेय, दिलीप जायसवाल, संतोष सिंह, नीरज बाबलू, नीतीश मिश्रा आ केदार गुप्ताक नाम शामिल अछि। संगहि संग जदयू विधायक ओ पूर्व डिप्टी स्पीकर महेश्वर हजारी सेहो मंत्री बनलाह।
संवैधानिक प्रावधानक अनुसार बिहारमे मुख्यमंत्री सहित अधिकतम ३६ मंत्री भऽ सकैत अछि। फिलहाल राज्य मंत्रिमंडलमे मुख्यमंत्री नीतीश कुमार समेत कुल ९ मंत्री छलथि। एहिमे सम्राट चौधरी आ विजय कुमार सिन्हा उपमुख्यमंत्री छथि। एकर अलावा बीजेपीक डॉ. प्रेम कुमार, विजय कुमार चौधरी, बिजेंद्र प्रसाद यादव, श्रवण कुमार (तीनू जेडीयू केर), हम केर संतोष कुमार सुमन आ निर्दलीय सुमित कुमार सिंह सेहो मंत्री पदक शपथ लेने छलथि।
