राजग सरकार संसदमे परिसीमन विधेयक पारित सुनिश्चित करत : गृहमंत्री
कोयम्बटूर। समदिया
केंद्रीय गृहमंत्री अमित शाह रविदिन एहि बात पर जोर देलनि जे एनडीए सरकार प्रस्तावित परिसीमन विधेयककेँ संसदमे पारित करब सुनिश्चित करत। ओ डीएमके-कांग्रेस गठबंधन पर आरोप लगौलनि जे तमिलनाडुमे राजनीतिक प्रतिनिधित्व बढ़ेबाक प्रयासमे बाधा पहुंचा रहल अछि। इरोड जिला केर मोडाकुरिचीमे चुनावी रैलीकेँ संबोधित करैत 23 अप्रैलकेँ होबय वला विधानसभा चुनावसँ पहिने गृहमंत्री शाह कहलनि कि केंद्र सरकार जनसांख्यिकीय बदलावकेँ ध्यानमे रखैत आ प्रतिनिधित्वमे सुधारक उद्देश्यसँ राज्यमे विधानसभा सीटक संख्यामे 50 प्रतिशतक बढ़ोत्तरीक प्रस्ताव रखने अछि। मुदा ओ आरोप लगौलनि जे डीएमके आ कांग्रेसक संकीर्ण राजनीतिक दृष्टिकोण आ निहित स्वार्थक कारण ई पहल रुकि गेल अछि। “हम एही साजिशकेँ स्वीकार नहि करबै। एनडीए सरकार तमिलनाडु केर जनताक आकांक्षा पूरा करय लेल प्रतिबद्ध अछि आ हम आश्वासन दैत छि कि सीमांकन विधेयक पारित भ जायत।”
केंद्रीय मंत्री विधानसभामे महिला आरक्षण लागू करबामे देरीक संबंधमे विपक्षक आलोचना सेहो केलनि। प्रस्तावित महिला आरक्षण विधेयकक जिक्र करैत केंद्रीय गृहमंत्री डीएमके-कांग्रेस गठबंधन पर महिलाक राजनीतिक भागीदारी बढ़ाबै केर प्रति वास्तविक प्रतिबद्धताक कमी केर आरोप लगैलनि।
राज्यक राजनीति पर ध्यान केंद्रित करैत गृहमंत्री शाह डीएमके नेतृत्व पर कड़ा हमला केलनि आ ओकरा पर राजवंशी शासनक बढ़ावा देबय केर आरोप लगौलनि। बिना ककरो नाम स्पष्ट रूपसँ लेने ओ पूर्व मुख्यमंत्री एम. करुणानिधि सँ ल कए हुनक पुत्र एम.के. स्टालिन दिस संकेत देलनि कि सत्ता केर अगिला हस्तांतरण संभावित रूपसँ उधयनिधि स्टालिनकेँ भ जायत।
