उत्तर प्रदेशमे सपाक तेवर आ कांग्रेसक आकांक्षा विपक्षी गठबंधनक लेल समस्या बनैत जा रहल अछि। दुनू समझौतासँ दूर होइत जा रहल अछि। प्रायः आब उत्तर प्रदेशमे समाजवादी पार्टी आ कांग्रेसक बीच कोनो गठबंधन नहिं होयत। सूत्रक मानी तऽ सपा आ कांग्रेस सीट पर सहमत नहिं भऽ सकल अछि।
सोमदिन समाजवादी पार्टी कांग्रेसकेँ गठबंधनक अन्तर्गत १७ सीटपर अपन उम्मीदवार ठाढ़ करबाक प्रस्ताव देने छल। एहिसँ पहिने सपा कांग्रेसकेँ ११ सीट पर चुनाव लड़बाक प्रस्ताव देने छल, जाहि पर दुनू दलक बीच बयानबाजी शुरू भऽ गेल छल। सोमदिन सपा अध्यक्ष अखिलेश यादव लोकसभाक १७ सीट कांग्रेसक लेल छोड़बाक निर्णय लेलनि।
सूत्रक अनुसार सपा कांग्रेसकेँ अमेठी, रायबरेली, बाराबंकी, सीतापुर, कैसरगंज, वाराणसी, अमरोहा, सहारनपुर, गौतम बुद्ध नगर, गाजियाबाद, बुलंदशहर, फतेहपुर सीकरी, कानपुर, हाथरस, झांसी, महाराजगंज आ बागपत देने छल।
कांग्रेस सूत्रक अनुसार, सपाकेँ १७ सीटक प्रस्ताव देल गेल अछि, मुदा पार्टी दिससँ एखन धरि कोनो प्रतिक्रिया नहिं आयल अछि। एहिसँ पहिने कांग्रेसक प्रदेश अध्यक्ष अजय राय ११ सीटक प्रस्तावपर असंतोष व्यक्त कयने छलाह। जकर बाद सपा नया सिरासँ सीटख चयन कयलक आ सूची कांग्रेस नेतृत्वकेँ पठा देलक।
जनतब जे समाजवादी पार्टी सोमदिन लोकसभा चुनावक लेल अपन उम्मीदवारक दोसर सूची जारी कयलक। एहि उम्मीदवार सभमे मुजफ्फरनगरसँ हरेन्द्र मलिक, आंवलासँ नीरज मौर्या, शाहजहांपुरसँ राजेश कश्यप, हरदोईसँ उषा वर्मा, मिश्रीखसँ रामपाल राजवंशी, मोहनलालगंजसँ आरके चौधरी, प्रतापगढ़सँ एसपी सिंह पटेल, बहराइचसँ रमेश गौतम, गोंडासँ श्रेया वर्मा, गाजीपुरसँ अफजल अंसारी आ चंदौलीसँ वीरेंद्र सिंह घोषित कयल गेल छथि।
