मुम्बईसँ २.४६ करोड़क हीराक गहना चुराबय वाला आरोपीकेँ मिथिला क्षेत्रीय बिहारक समस्तीपुरसँ गिरफ्तार कयल गेल अछि। आरोपी लगसँ गहना बरामद भेल अछि।
पुलिस बुधदिन कहलक जे मुम्बईसँ २.४६ करोड़ टाकाक हीराक गहना लऽ कऽ भागल चोरसभकेँ गिरफ्तार कयल गेल अछि। एहि शातिर चोरसभकेँ बिहारक समस्तीपुरसँ गिरफ्तार कयल गेल अछि। जानकारी दैत पुलिस अधिकारी कहलनि जे एकटा आरोपी मुंबईक खार थानाक हीरा व्यापारी सुनीताक घर पर घरेलू काज करैत छल। ओ चोरीक ई घटना अपन एकटा मित्रक सङ्ग कयलक आ भागि गेल। समस्तीपुरक हथौरी पुलिसक संग मुम्बई पुलिस दुनू आरोपीकेँ गिरफ्तार कयलक।
पुलिस कहलक जे चोर व्यापारीक परिवारकेँ नशा दऽ कऽ २.४६ करोड़ टाकाक हीराक गहना चुरा लेलक। पुलिस आरोपी लगसँ गहना बरामद कयलक अछि। आरोपीक पहचान नीरज उर्फ राजा यादव (१९) आ राजू उर्फ शत्रुधन कुमार (१९) केर रूपमे भेल अछि।
दुनू गोटे १० फरवरीकेँ परिवारक सदस्यक भोजनमे किछु मादक पदार्थ मिला कऽ चोरी कयलक।
परिवारक सदस्यकेँ अस्पतालमे भर्ती करए पड़ल।
अधिकारी कहलनि जे ई घटना ११ फरवरीकेँ सोझाँ आयल जखन ५५ वर्षीय शिकायतकर्ताकेँ पता चलल जे हुनकर फ्लैटसँ हीराक गहना गायब छल। “परिवारक सदस्यसभकेँ अस्पतालमे भर्ती करय पड़लनि किएक तँ ओ सभ नीनसँ उठलाक बाद उल्टी करय लगलाह। बादमे एफआईआर दर्ज कएल गेल। पुलिस राजा यादव आ शत्रुधन कुमारक आधार कार्डक विवरण आ तकनीकी सहायताक सहायतासँ पता लगा लेलक। पुलिस अधिकारी बतौलनि जे दुनू अभियुक्तकेँ भारतीय दंड संहिताक धारा ३२८ (जहरसँ चोट पहुँचायब), ३८१ (नौकर द्वारा चोरी), आ ३४ (सामान्य इरादा)क अन्तर्गत गिरफ्तार कयल गेल अछि। एकटा आरोपी कुमारकेँ पहिने पुलिस ५० लाख टकाक चोरीक मामिलामे गिरफ्तार कयने छल। अधिकारी कहलनि, आगूक जांच जारी अछि।
