बिहारक मंत्री अशोक चौधरी कहलनि अछि जे देशकेँ मुगल नहिं लूटलक, ओ सभ हमर देश पर शासन कयलक आ एतय बहुत किछु छोड़ि गेल। बिहार सरकारक भवन निर्माण मंत्री अशोक चौधरी जमुईमे कहलनि जे देशकेँ अंग्रेज लूटि लेलक। ओ कहलनि “मुगल हमरा सभपर शासन कयलक आ फेर बहुत किछु पाछू छोड़ि गेल। मुदा मुगलक बाद आयल अङ्ग्रेज एतय शासन कयलक आ सब किछु लूटि लेलक।” बिहारक मंत्री भाजपा पर धर्मक नाम पर लोककेँ विभाजित करबाक आरोप लगओलनि।
अशोक चौधरी कहलनि – किछु दल धर्मक नाम पर लोककेँ गुमराह कऽ रहल अछि। हम रोज भोरे उठैत छी आ भगवानक नामजप करैत छी, मुदा की पता, जे कोनो दिन हम अजमेर शरीफ चलि जाय आ इस्लाम स्वीकार करबाक मन करय लागय। तहिना कोनो दिन हम लछुआड़ भगवान महावीरक जन्मभूमि पर जाई आ जैन धर्म स्वीकार कय ली। हमरा एहिमे कोनो आपत्ति नहिं अछि।
जेडीयूमे फूटक सवाल पर अशोक चौधरी कहलनि कि जनता दल यूनाइटेड पूरा सुरक्षित अछि। किछु लोक हमर पार्टीक खिलाफ भ्रम फैला रहल छथि जे नेतृत्व कमजोर भऽ रहल अछि। पार्टी मजबूत अछि। पार्टी के नेता लगातार भेंट कए रहल छथि। पार्टीक कमजोर होयब वा बँटवाराक बात बकवासक विषय अछि। ओ कहलनि जे नीतीश जी मजबूती सं ठाढ़ छथि। हम एतबे कहब जे ‘टाइगर एखनो जीवित अछि।’ संगहि भाजपा पर कटाक्ष करैत ओ कहलनि जे भाजपा राम मंदिर निर्माणक नाम पर लोककेँ गुमराह कऽ रहल अछि।
अशोक चौधरी कहलनि जे राम मंदिर निर्माण नीक बात अछि। मुदा भाजपा एकर श्रेय लए रहल अछि। जखन कि ई सुप्रीम कोर्टक कारण संभव भेल अछि। ओ कहलनि जे नीक होइत जे भाजपा लोककेँ रोजगारक सङ्ग-सङ्ग मन्दिर बनयबाक बात करैत । आइ देशक एकटा पैघ वर्ग गरीबी रेखासँ नीचा अछि। मुदा ओकर बात नहिं भऽ रहल अछि। मुख्यमंत्री नीतीशकेँ अयोध्या जाय केर सवाल पर ओ कहलखिन कि जँ निमंत्रण आयल होयत आ नीतीश कुमारकेँ लगतनि जाय केर चाही तऽ जयताह।
