लोकसभा चुनावसँ पहिने प्रधानमंत्री नरेन्द्र मोदी तमिलनाडुक कन्याकुमारी पहुँचलाह। एतय एकटा जनसभाकेँ सम्बोधित करैत प्रधानमंत्री मोदी इंडिया गठबंधनपर भयंकर निशाना साधलनि। ओ विपक्षी गठबंधनक घोटालाकेँ सूचीबद्ध करैत कहलनि जे सूची बहुत नमहर अछि।
प्रधानमंत्री नरेन्द्र मोदी कहलनि, “आइ कन्याकुमारीसँ देशक एहि दक्षिणी छोरसँ जे लहर उठल अछि, ई लहर बहुत दूर तक जायवाला अछि। हम १९९१ मे कन्याकुमारीसँ एकता यात्रा लय कश्मीर तक गेल छलहुँ, एहि बेर हम कश्मीरसँ कन्याकुमारी आयल छी। जम्मू-कश्मीरक लोक देशकेँ तोड़बाक सपना देखनिहारकेँ खारिज कऽ देलक अछि। आब तमिलनाडुक लोक सेहो वैह करय जा रहल छथि। हम तमिलनाडुक माटि पर बहुत पैघ परिवर्तन देखि रहल छी। तमिलनाडुमे भाजपाक प्रदर्शन एहि बेर डीएमके आ कांग्रेसक इंडी गठबंधनक सभ अहंकारकेँ तोड़ि देत।”
पीएम मोदी आगू कहलखिन, “हम ऑप्टिकल फाइबर आ ५जी देलहुं, हमर नाम पर डिजिटल इंडिया स्कीम अछि। इंडिया गठबंधनक नाम पर लाखो करोड़क २जी घोटाला अछि, आ ओहि लूटमे डीएमके सबसँ पैघ भागीदार छल। हमर नाम पर उड़ान स्कीम अछि, इंडी गठबंधनमे हेलीकॉप्टर घोटाला अछि। हमर खेलो इंडिया आ टीओपीएस स्कीमसँ देश खेलमे उच्च स्थान प्राप्त कयलक, मुदा हुनक नाम पर कॉमन वेल्थ गेम्स घोटालाक दाग अछि।”
पीएम मोदी आरोप लगओलनि जे इंडी गठबंधन तमिलनाडुकेँ कहियो विकसित नहिं कऽ सकैत अछि। “एहि (इंडी गठबंधन) लोकक घोटालाक इतिहास रहल अछि। एहि लोकक राजनीतिक आधार जनताकेँ लूटबाक लेल सत्तामे आयब अछि। एक दिस भाजपाक कल्याणकारी योजना अछि, त दोसर दिस हिनक करोड़क घोटाला होइत अछि।”
प्रधानमंत्री नरेन्द्र मोदी डीएमके पर सेहो निशाना साधलनि। ओ डीएमकेकेँ तमिलनाडुक दुश्मन बतौलनि अछि। “डीएमके मात्र तमिलनाडुक भविष्यक दुश्मन नहिं अछि, ई तमिलनाडुक अतीत आ ओकर विरासतक दुश्मन सेहो अछि। “जल्लीकट्टू पर प्रतिबंध जखनि लागल छल तखनो डीएमके आ कांग्रेस चुप बैसल छल। ई सभ तमिल संस्कृति केर नष्ट करए चाहैत छथि। ई हमर सरकार, एनडीए सरकार अछि जे जल्लीकट्टूकेँ पूरा उत्साहक सङ्ग मनयबाक मार्ग प्रशस्त कयलक।”
विपक्षी गठबंधनपर निशाना साधैत पीएम मोदी कहलनि, “जखन दिल्लीमे संसदक नव भवन बनल, तखन हम तमिल संस्कृतिक प्रतीक, एहि भूमिक आशीर्वादक रूपमे नव भवनमे पवित्र सेंगोल स्थापित कयलहुँ, मुदा ई लोकसभ एकर बहिष्कार सेहो कयलनि, हुनका सेंगोलक स्थापना पसिन्न नहि पड़ल।” “हम अयोध्यामे राम मन्दिर प्राण प्रतिष्ठा कार्यक्रमसँ पहिने एतय आयल छलहुँ, हम एतय प्राचीन तीर्थस्थलक भ्रमण कयने छलहुँ, मुदा डीएमके अयोध्यामे प्राण प्रतिष्ठा समारोह केर देखय तक पर प्रतिबन्ध लगयबाक प्रयास कयने छल। सर्वोच्च न्यायालयकेँ तमिलनाडु सरकारकेँ कड़ा फटकार लगाबय पड़ल।”
प्रधानमंत्री मोदी तमिलनाडुक विकास पर सेहो अपन बात रखलनि। ओ कहलनि जे ओ राज्यमे सम्पर्क विकसित करबाक लेल रेलवे आ राजमार्गक नेटवर्क तैयार कऽ रहल छथि। पिछला १० सालमे लगभग ५०,००० करोड़ टाकाक काज पूरा भेल अछि। ओतहि ७०,००० करोड़ टाकाक परियोजनाक काज एखनो चलि रहल अछि।
