तेजस्वी आ तेजप्रताप अपन चाचा महावीर यादवक निधनक बाद नहिं कटेलनि केश : जदयू प्रवक्ता नीरज कुमार

पटना
*

एकटा वीडियो जारी कय जदयू प्रवक्ता नीरज कुमार कहलनि, “लालू यादवक दूनू बेटा तेजस्वी आ तेज प्रताप यादव अपन चाचा महावीर यादवक निधनक बाद अपन केश नहि मुंडौलनि।
राजद सुप्रीमो लालू यादव द्वारा प्रधानमंत्री नरेन्द्र मोदीक खिलाफ ‘परिवार’सँ जुड़ल विवादित बयान केर जदयू कड़ा जवाबी कार्रवाई कयलक अछि। जदयू नेता नीरज कुमार बिहारक पूर्व उपमुख्यमंत्री तेजस्वी यादव आ तेज प्रताप यादवक पुरान तस्वीर जारी करैत पूछलनि अछि जे लालू यादव आब कोन मुँहसँ ‘हिन्दू धर्मक प्रमाणपत्र’ बाँटताह। एहिसँ पहिने बिहारक उपमुख्यमंत्री विजय कुमार सिन्हा रविदिन राजद अध्यक्ष लालू प्रसाद द्वारा प्रधानमंत्री नरेन्द्र मोदीक विषयमे देल गेल टिप्पणीक आलोचना करैत एकरा आपत्तिजनक आ सनातन धर्मक प्रति अपमानजनक बतओने छलाह।

नीरज कुमार बयानक प्रतिक्रियामे वीडियो जारी करैत कहलनि, “२६ मार्च २०२१ केर लालू यादवक भाई महावीर यादवक निधन भऽ गेल। लालू यादवक बेटा तेजस्वी यादव आ तेज प्रताप यादव शवयात्रा अर्थात कटिहारीमे शामिल भेलाह, मुदा ७ अप्रैल आ ९ अप्रैल केर जारी तस्वीरमे दुनू गोटेक केश नहिं कटायल अछि। आब कोन मुँहसँ हिन्दू धर्मक प्रमाणपत्र बांटताह लालू जी ? प्रधानमंत्री मोदी सोमदिन पूरा भारतकेँ अपन परिवार बतौलनि आ अपन जीवनकेँ “खुजल किताब” बतौलनि आ कहलनि कम उम्रमे लोकक सेवाक सपनाक सङ्ग घर छोड़ि देने छलौंह।

मामिला ई अछि जे रविदिन पटनामे एकटा रैलीकेँ सम्बोधित करैत लालू यादव कहने छलाह, “जँ नरेन्द्र मोदीक अपन परिवार नहिं अछि तखन हम की कऽ सकैत छी। ओ सभ राम मन्दिरक घमंड करैत रहैत छथि। ओ सभ सच्चा हिन्दू सेहो नहिं छथि। हिन्दू परम्परामे बेटाकेँ अपन माता-पिताक मृत्युपर माथ आ दाढ़ीक मुण्डन करेबाक चाही। जखन मोदीक मायक मृत्यु भेल तखन ओ से नहिं कयलनि।

प्रधानमंत्री मोदी लालूक आरोपक जवाब दैत कहलनि जे भ्रष्टाचार, परिवारवाद आ तुष्टिकरणमे आकंठ डूबल ‘इन्डी एलायंस’क नेता खौंझा रहल छथि।
पीएम मोदी जवाब देने छलाह, ‘हम हुनकर परिवारवाद पर सवाल उठबैत छी, तखन ई लोक आब ई कहय लागल अछि जे मोदीक कोनो परिवार नहिं अछि। काल्हि ओ इहो कहि सकैत छथि जे अहाँकेँ कहियो जेलक सजा नहिं भेटल अछि तेँ अहाँ राजनीतिमे शामिल नहिं भऽ सकैत छी। पीएम मोदी १४० करोड़ देशवासीकेँ अपन परिवार बतौलनि आ कहलखिन जे जिनकर कियो नहिं अछि ओ सेहो मोदीक छथि आ मोदी हुनकर छथि। ओ कहलनि, “हमर भारत, हमर परिवार, एहि भावनाक प्रसार कऽ हम अहाँक लेल जीबि रहल छी, अहाँक लेल लड़ि रहल छी आ संकल्पक सङ्ग अपन सपना पूरा करबाक लेल अहाँक लेल लड़ैत रहब।”