बिहार विधान परिषदक रिक्त होबयवला ११ सीटक लेल चुनाव प्रक्रिया शुरू भऽ गेल अछि। जाहि सीटक लेल चुनाव हेबाक अछि, ओहिमे एकटा सीट कांग्रेसक सेहो अछि, मुदा ओ सीट सेहो कांग्रेसकेँ नहिं आयल। महागठबंधन द्वारा जारी उम्मीदवारक सूचीमे कांग्रेसक उम्मीदवारक नाम नहिं अछि।
दरअसल महागठबंधन द्वारा शुक्रकेँ जारी उम्मीदवारक सूचीमे राजदक चारि आ सीपीआई (एमएल) केर एक उम्मीदवारक नाम देल गेल अछि। महागठबंधनक एकटा नेता यद्यपि एहि मामिलामे स्पष्ट करैत छथि जे राज्यसभा चुनावमे महागठबंधनक कोटामे जे तीन सीट आयल छल, ओहिमेसँ एकटा सीट कांग्रेसक खातामे आयल। मुदा सवाल उठाओल जा रहल अछि जे राज्यसभामे वैऽह सीट कांग्रेसकेँ देल गेल, जे हुनका लग पहिनेसँ छल। एहि लेल राजद आ वाम दल सब मिलि कए विधान परिषद चुनावमे कांग्रेस केर कात कय देलक।
हालक समयमे बिहारमे कांग्रेसक लेल ई दोहरा संकटसँ कम नहिं अछि। कांग्रेसक दूटा विधायक मुरारी गौतम आ सिद्धार्थ सौरव भाजपाक समर्थनमे चलि गेल छथि आ आब विधान परिषदक सीटसँ सेहो हाथ धोबय पड़ल।
कांग्रेसक भीतर चर्चा अछि जे राज्यसभामे प्रदेश अध्यक्ष अखिलेश सिंहकेँ फेरसँ भेजयमे वामपंथी दलक समर्थन भेटल छल। विधान परिषद चुनावमे एहि उपकारक बदलामे कांग्रेसक विधायक वाम दलक उम्मीदवारकेँ सहयोग करताह।
ओम्हर भाजपा प्रवक्ता राकेश सिंह चुटकी लैत कहलनि जे बिहारमे कांग्रेसक अस्तित्व नहिं अछि, जतय ओ राजदक बी टीमसँ बेसी किछु नहिं अछि। कांग्रेस राजदक निर्देशक अनुसार करत।
बिहारमे विधान परिषदक ११ सीटपर चुनाव होबयवला अछि, जकर प्रक्रिया शुरू भऽ गेल अछि। मतदान २१ मार्चकेँ होएत। निर्वाचित सदस्यक कार्यकाल मईमे समाप्त भऽ रहल अछि।
विधान परिषदक जाहि सदस्यक कार्यकाल समाप्त होयत ओहिमे मुख्यमंत्री नीतीश कुमार, संजय झा, पूर्व मुख्यमंत्री राबड़ी देवी, भाजपाक शाहनवाज हुसैन, कांग्रेस नेता प्रेमचन्द्र मिश्र, हिन्दुस्तानी अवाम मोर्चाक संतोष कुमार सुमन, भाजपा नेता मंगल पाण्डेय, राजद नेता रामचंद्र पूर्वे, जदयू नेता खालिद अनवर, रामेश्वर महतो आ भाजपा नेता संजय पासवान सम्मलित छथि।
