निरंतर अभ्यासे सँ सफलता संभव – डॉ.संत चौधरी

दरभंगा। समदिया

दृष्टि दिव्यांग सभक दृढ़ इच्छा शक्ति अनुकरणीय अछि। पारस्परिक सौहार्दक प्रतीक होइत अछि खेल। उक्त बात क्रिकेट एसोसिएशन फॉर द ब्लाइंड इन बिहार द्वारा कामेश्वर सिंह दरभंगा संस्कृत विश्वविद्यालयक खेल मैदानमे आयोजित पांच दिवसीय राष्ट्रीय नागेश ट्रॉफी चयन शिविर के पुरस्कार वितरण सह समापन समारोह में बतौर मुख्य प्रख्यात शिक्षाविद डॉ. संत कुमार चौधरी कहला। आगू डॉ. चौधरी खिलाड़ी सभक उत्साहवर्धन करैत एहेन प्रकारक आयोजन सभक लेल अपन प्रतिबद्धता दोहरौलैन। अति विशिष्ट अतिथि शिक्षाविद शिवकिशोर राय दृष्टि दिव्यांग सभक अपार ऊर्जा एवं अदम्य उत्साहक भूरि-भूरि प्रशंसा कयलैथ। संगहिं ओ कुलपति द्वारा सहजता स’ खेल मैदान उपलब्ध कराओल जएबा पर साधुवाद देलैन। विशिष्ट अतिथि कुमार राघवेंद्र मोहन चौधरी श्रीमद्भागवत एवं गीता के उद्धरण सभक द्वारा मानव जीवनमे खेल भावनाक सार्वकालिक महत्व पर विस्तार स’ प्रकाश देलैन। अध्यक्षीय उद्बोधनमे डॉ. मित्रनाथ झा मानव जीवनमे प्रत्येक अभियानमे खेल भावना के सकरात्मक प्रयोग कें अपरिहार्य बतौलैन। क्रिकेट एसोशियेशन फॉर द ब्लाइंड इन बिहारक महासचिव राकेश किरण बतौलैन जे चयन शिविरक समापनक तुरंत बाद बिहारक टीमक घोषणा कयल जायत। दृष्टि दिव्यांग सभक द्वारा क्रिकेटक एहि ऐतिहासिक टूर्नामेंटक सफल आयोजनक लेल समाजक प्रो. जयशंकर झा जेहेन बुद्धिजीवी के प्रति हार्दिक आभार व्यक्त कयला।

विजेता टीम बिहार बी के कप्तान अंगद कुमार विनर ट्रॉफी अतिथ थि सभ स’ प्राप्त कयलैथ। रनर टीम बिहार ए के कप्तान पिंटू कुमार साह कें सेहो रनर ट्रॉफी देल गेल। कोच श्रीकांत सहनी के सफल निर्देशनमे आयोजित एहि टूर्नामेंटक मैन ऑफ द मैच आ मैन ऑफ द सीरीज रहला अंगद कुमार। अन्य मैच सभक मैन ऑफ द मैच क्रमशः गौतम कुमार एवं साहब हुसैन कें सेहो प्रतीक चिन्ह देल गेल। कार्यक्रमक मंच संचालन संयोजक उज्ज्वल कुमार तथा धन्यवाद ज्ञापन ऋतिक कुमार द्वारा कयल गेल।