लोकसभामे महुआ मोइत्रा मामिलाक एथिक्स कमेटीक रिपोर्ट पेश

हल्ला-गुल्लाक बाद लोकसभाक कार्यवाही स्थगित
*
नई दिल्ली
*
कैश फॉर क्वेरी मामिलामे महुआ मोइत्राक विरुद्ध जाँच करयवला एथिक्स कमेटी शुक्रदिन लोकसभामे अपन रिपोर्ट प्रस्तुत कयलक। जहिना एथिक्स कमेटीख अध्यक्ष विनोद सोनकर समितिक जाँच रिपोर्ट सदनमे प्रस्तुत कयलनि, तृणमूल कांग्रेसक सांसद सरकारक विरुद्ध नाराबाजी शुरू कऽ देलनि। तृणमूल कांग्रेसक सांसद नाराबाजी करैत बीचोबीच आबि गेलाह। कांग्रेस, एनसीपी, डीएमके, सपा आ बसपा सहित कतेको विपक्षी दलक सांसद तृणमूल कांग्रेसक समर्थन करैत अपन सीट पर ठाढ़ भऽ गेलाह।

पीठासीन सभापति राजेन्द्र अग्रवाल आन्दोलित सांसदसभकेँ ई कहैत शान्त करबाक प्रयास करैत देखल गेलाह जे ई मात्र रिपोर्ट प्रस्तुत कयल गेल अछि आ एखन धरि एहि पर चर्चा नहि भेल अछि। मुदा हंगामा आ नाराबाजी जारी रहला पर अग्रवाल लोकसभाकेँ २ बजे धरि स्थगित कऽ देलनि। एहिसँ पहिने प्रश्नकालक दौरान हंगामाक कारण लोकसभाक कार्यवाही दुपहरिया १२ बजे धरि स्थगित कऽ देल गेल छल।

जनतब दी जे महुआ मोइत्रा मामिलामे आचार समिति पिछले महीना १० नवंबर कऽ लोकसभा अध्यक्ष ओम बिड़लाकेँ अपन रिपोर्ट भेजने छल। लोकसभा अध्यक्ष बिड़लाक निर्देश पर एथिक्स कमेटी लगभग ५०० पृष्ठक अपन रिपोर्ट तैयार कयने छल, जकरा एथिक्स कमेटीक बैसारमे ६-४क अन्तरसँ अनुमोदित कयल गेल छल।

सूत्रक अनुसार, एथिक्स कमेटी महुआ मोइत्राक विरुद्ध आरोपकेँ बहुत गम्भीर आ हुनकर आचरणकेँ आपत्तिजनक आ अनैतिक बतओलक अछि। एकर आधार पर समिति महुआकेँ संसद के सदस्यता रद्द करय वा गहन जांचक रिपोर्ट भेटय तक हुनकर सदस्यता निलंबित करय केर सिफारिश कयलक अछि।

समिति अपन रिपोर्टमे भारत सरकारकेँ पूरा मामिलाक समयबद्ध, गहन, कानूनी आ संस्थागत जाञ्चक सिफारिश कयलक अछि आ महुआ मोइत्रा आ दर्शन हीरानंदानीक बीच धनक लेनदेनक गहन जाञ्चक सिफारिश सेहो कयलक अछि। समिति महुआ मोइत्राक खिलाफ सख्त कार्रवाईक सिफारिश कयलक अछि।