डीएमके नेता दयानिधि मारनक एकटा वीडियो वायरल भेलाक एक दिन बाद बिहारमे भाजपा नेता लोकनि मुख्यमंत्री नीतीश कुमार आ राजद सुप्रीमो लालू प्रसादक चुप्पी पर आलोचना कयलनि। मारन वीडियोमे कथित रूपसँ बिहार आ उत्तर प्रदेशक लोकक विषयमे अपमानजनक टिप्पणी कयने छलाह।
बिहार इकाई भाजपा अध्यक्ष सम्राट चौधरी कहलनि, “कांग्रेस, जदयू आ राजदक नेताकेँ माफी मांगबाक चाही, मारनक बिहार आ उत्तर प्रदेशक जनताक अपमानक लेल। लालू प्रसाद आ नीतीश कुमारकेँ अपन चुप्पी तोड़बाक चाही। भाजपा एहि टिप्पणीपर कड़ा आपत्ति जतौलक अछि आ दयानिधि मारनसँ माफी मांगबाक माँग कयलक अछि। अगर ओ माफी नहिं मांगैत छथि तऽ पार्टीक नेता आंदोलन शुरू करत। मारनक आलोचना करैत गृह राज्य मंत्री नित्यानन्द राय कहलनि, “प्रधानमंत्री नरेन्द्र मोदीक नेतृत्ववला सरकार ‘एक भारत, श्रेष्ठ भारत’क अवधारणासँ देशक निर्माण कऽ रहल अछि, मुदा इंडिया गठबन्धनक नेता उत्तर आ दक्षिण भारतक बीच भेदभाव कऽ रहल छथि। हुनक प्रयास सफल नहिं होएत। प्रधानमंत्री नरेन्द्र मोदी सफाईकर्मीकेँ सेहो सम्मानित करैत छथि। मुदा किछु लोक एहन बात कहैत अछि आ मतभेद उत्पन्न करैत अछि। दयानिधि मारनकेँ राष्ट्रसँ माफी मांगबाक चाही।”
एम्हर भाजपाक वरिष्ठ नेता आ राज्यसभा सदस्य सुशील कुमार मोदी कहलनि, “की इंडी गठबंधनक नेता आब डीएमकेकेँ गठबंधनसँ बाहर राखत ? तमिलनाडुमे बहुत गोटे निर्माण क्षेत्रमे लागल छथि आ दयानिधि मारनक शौचालय साफ करबाक टिप्पणी बहुत आपत्तिजनक अछि। राज्य आ भाषाक आधार पर दयानिधि मारनक टिप्पणी पर नीतीश कुमार आ लालू प्रसाद चुप किएक छथि ? तमिलनाडुक मुख्यमंत्री एम. के. स्टालिनकेँ ओकरा पर कार्रवाई करए केर चाही।’
दयानिधि मारन कथित रूपसँ एकटा कार्यक्रमक दौरान कहलनि जे “बिहार आ उत्तर प्रदेशक लोक तमिलनाडु आबि शौचालय साफ करैत छथि। जे लोक हिन्दी बजैत छथि ओ एतय अबैत छथि आ छोट पैमाना पर निर्माण कार्यमे लागि जाइत छथि।”
