आजीवन प्रधानमंत्री नरेन्द्र मोदीक संग रहब।
की कांग्रेसमे वैऽह रहि सकैछ जे सनातनकेँ मिटाबय केर बात करय?
मोदीसँ नफरत करैत कांग्रेस पुरा देशसँ नफरत करय लागल अछि।
कांग्रेस अध्यक्ष मल्लिकार्जुन खड़गे बस रबर स्टाम्प।
जे व्यक्ति अपन माय आ बहिनक सम्मान नहिं कय सकैछ, ओ देशक की सम्मान करत।
की भगवान रामक नाम लेब पार्टी विरोधी अछि ?
*
नई दिल्ली
*
कांग्रेस अपन नेता आचार्य प्रमोद कृष्णमकेँ अनुशासनहीनता आ पार्टी विरोधी बयानक कारण पार्टीसँ निष्कासित कऽ देलक अछि। कांग्रेसक एहि कार्रवाईक बाद राजनीतिक बयानबाजी शुरू भऽ गेल अछि। कांग्रेससँ निष्कासित नेता आचार्य प्रमोद कृष्णम प्रतिक्रिया देलनि अछि।
कांग्रेससँ निष्कासित भेला पर नेता आचार्य प्रमोद कृष्णम कहलनि, “१६-१७ वर्षक आयुमे हम राजीव गाँधीसँ देल गेल वचन आइ धरि पूरा कयलहुँ आ आइ एहि आयुमे हम शपथ लऽ रहल छी जे हम जीवन भरि प्रधानमंत्री नरेन्द्र मोदीक सङ्ग ठाढ़ रहब। हुनकर बयानक बाद आब भाजपामे जाय केर संकेत भेटि रहल अछि।
कांग्रेस नेता आचार्य प्रमोद कृष्णम कहलनि, “सवाल ई अछि जे कांग्रेस महात्मा गाँधीक कांग्रेस छल। ओ कांग्रेस आइ कोन राह पर आनल गेल अछि ? की केवल ओ लोक कांग्रेसमे रहि सकैत छथि जे सनातनक उन्मूलनक बात करैत अछि ? हम ई स्पष्ट करय चाहैत छी जे ‘राम आ राष्ट्र’ पर कोनो समझौता नहिं भऽ सकैत अछि। निष्कासन बहुत छोट चीज अछि।”
कांग्रेस नेता आचार्य प्रमोद कृष्णम कहलखिन, “हम कांग्रेसक विचारधारासँ जुड़ल छी। सर्वप्रथम रामराज्यक सपना महात्मा गाँधी देखलनि, तेँ महात्मा गाँधी जे सपना देखलनि ओ मोदी जी पूरा कऽ रहल छथि आ जँ नरेन्द्र मोदी भारतक प्रधानमंत्री छथि आ देशक हितमे नीक निर्णय लऽ रहल छथि तखन हुनक समर्थन होयबाक चाही। मुदा कांग्रेस पार्टीक नेतृत्व नरेन्द्र मोदीसँ एतेक नफरत करय लागल अछि जे ओ मोदीसँ नफरत कऽ पूरा देशसँ नफरत करय लागल अछि, मोदीसँ नफरत कऽ रहल अछि आ सनातनकेँ मिटाबय पर तुलल अछि।’
अपन विरुद्ध कांग्रेसक एहि कार्रवाईक बाद आचार्य प्रमोद कृष्णम कांग्रेसपर भयंकर हमला कयलनि। आचार्य प्रमोद कृष्णम कहलखिन, “सचिन पायलटकेँ बहुत अपमान भेल अछि मुदा भगवान शिव जकाँ ओ जहर पीबैत जा रहल अछि, तहिना प्रियंका गांधीकेँ सेहो अपमान कयल जा रहल अछि।”
कांग्रेसक पूर्व नेता कहलखिन, “देशक आजादीक बाद कोनो पदाधिकारीक सामने ई नहिं लिखल गेल जे प्रियंका गांधीक सामने लिखल गेल, हुनक सामने लिखल गेल प्रियंका गांधी बिना कोनो विभागक महासचिव। सवाल ई अछि जे, जे अपमान कएल जा रहल अछि, ई केकर इशारापर भऽ रहल अछि ? अपमानक निर्देशन के कऽ रहल अछि किएक तँ हमर अध्यक्ष (मल्लिकार्जुन खड़गे) मात्र एकटा रबर स्टैम्प छथि।”
कांग्रेस सँ निष्कासित नेता आचार्य प्रमोद कृष्णम कहलखिन, “हम नहि जनैत छी जे हम कतए जाएब। हम भगवान पर भरोसा करैत छी, जतय भगवान हमरा लए जाएत, हम जाएब। हम नरेन्द्र मोदी जीक संग छी आ मोदी जी देशक संग छथि।”
आचार्य प्रमोद कृष्णम कहलखिन, “हर नेता हमरासँ पूछि रहल छथि जे आचार्य प्रमोद कृष्णम के की गलती छल ? हम ओहि सभ नेताकेँ धन्यवाद दैत छी जे कांग्रेस पार्टीमे रहबाक क्रममे हमर समर्थन कयलनि। जे व्यक्ति अपन माय या बहिनक सम्मान नहि कय सकैछ, ओ देशक सम्मान की करत ?”
आगू कहलनि “हमरा काल्हि राति कतेको समाचार चैनलक माध्यमसँ पता चलल जे कांग्रेस पार्टी एकटा पत्र जारी कयलक अछि “आचार्य प्रमोद कृष्णमकेँ पार्टी विरोधी गतिविधिक कारण छह सालक लेल पार्टीसँ निष्कासित कऽ देल गेल अछि। सबसँ पहिने हम कांग्रेस पार्टीक नेतृत्वक प्रति आभार व्यक्त करैत छी जे हमरा कांग्रेससँ मुक्त करबाक फरमान जारी कयलक। मुदा केसी वेणुगोपाल या मल्लिकार्जुन खड़गेकेँ हमरा बताबय केर चाही जे कोन गतिविधि पार्टीक खिलाफ छल, की भगवान रामक नाम लेब पार्टी विरोधी अछि ?
