लोकसभा चुनावक तारीखक घोषणा कऽ देल गेल अछि। लोकसभा चुनाव ७ चरणमे होयत। ई १९ अप्रैलसँ शुरू होयत, जखन कि सातम चरणक मतदान १ मईकेँ होयत आ चुनावक परिणाम ४ मईकेँ घोषित कयल जायत। शनिदिन राज्य निर्वाचन आयोग सभ सरकारी भवनसँ राजनीतिक दलक पोस्टर आ बैनर हटयबाक सख्त निर्देश देलक अछि। ओतहि चुनावक तारीखक घोषणाक बाद बिहारक मुख्य निर्वाचन अधिकारी एचआर श्रीनिवासन शनि कऽ एकटा संवाददाता सम्मेलन कयलनि जाहि दौरान ओ निर्देश देलनि जे अगिला ४८ घंटाक भीतर सभटा चुनावी पोस्टर हटा देल जाय। संगहि २४ घंटाक भीतर सभ सरकारी भवनसँ पोस्टर आ बैनर हटाबय केर निर्देश देल गेल अछि। चुनावक सम्बन्धमे श्रीनिवासन कहलनि जे चुनावी प्रलोभनपर रोक लगा देल गेल अछि। मतदाताकेँ पैसासँ लुभा नहिं सकैत छी। एकर संगहि वरिष्ठ नागरिककेँ विशेष सुविधा देल जायत। कहल गेल अछि जे ८५ वर्षसँ बेसी आयुक व्यक्ति मतपत्र पर मतदान कऽ सकैत अछि। बिहारमे ४० लोकसभा सीटक लेल सात चरणमे मतदान होयत।
लोकसभा चुनावक मतदानक सम्बन्धमे निर्वाचन आयोग कहलक जे राज्यमे मतदानक प्रतिशत बढ़ेबाक प्रयास कयल जा रहल अछि। जिला निर्वाचन अधिकारी सभकेँ सेहो एहि सम्बन्धमे अभियान चलयबाक निर्देश देल गेल अछि। बता देब जे २०१९ केर लोकसभा चुनावमे बिहारमे मतदान प्रतिशत ५७.३३ छल, जखन कि राष्ट्रीय औसत ६७.४७ छल। मतदाता सभकेँ एहि प्रतिशतकेँ बढ़ेबाक लेल जागरूक कयल जा रहल अछि।
निर्वाचन आयोगक अधिकारीसभसँ प्राप्त जानकारीक अनुसार, २०१४ मे मतदान लिंगानुपात बढ़ि कऽ ९०९ भऽ गेल अछि, जे वर्ष २०१९ मे ८९२ छल। जनतब जे २४३ विधानसभा क्षेत्रमे सँ ११७ विधानसभा क्षेत्रमे लिंगानुपात ९०९ सँ बेसी अछि।
