राजदकेँ फेरसँ झटका, राजदक पूर्व प्रवक्ता मृत्युंजय तिवारी भाजपामे शामिल

पटना। समदिया

बिहारमे राष्ट्रीय जनता दल (राजद) केँ फेरसँ पैघ राजनीतिक झटका लागल अछि। पार्टीक पूर्व प्रदेश प्रवक्ता मृत्युंजय तिवारी भारतीय जनता पार्टी (भाजपा)मे शामिल भ गेल छथि। लालू यादवक लंबा समयसँ वफादार तिवारी आब भाजपाक संग नव राजनीतिक पारीमे उतरि गेल छथि। पार्टीमे शामिल हेबासँ पहिने ओ पटनाक हनुमान मंदिरमे प्रार्थना केलथि।

एहि अवसर पर मृत्युंजय तिवारी कहलनि जे, “सभकेँ पता अछि जे हम सभ मंगल दिन एतय अबैत छी आ नित्य सुंदरकांडक पाठ करैत छी। हम भगवान रामक भक्त छी।” 16 जुलाईकेँ जखन ओ राजद छोड़लथि तँ तिवारी तेजस्वी यादव पर गंभीर आरोप लगौने छलाह। ओ पार्टी नेता तेजस्वी यादव आ पार्टी नेतृत्व पर लगातार उपेक्षा आ अपमानित करबाक आरोप लगौलनि। ओ कहलनि जे, ओ एखनो लालू प्रसाद यादव आ राबड़ी देवीक बहुत सम्मान दैत छथि, मुदा पार्टीक वर्तमान स्थिति दयनीय अछि।

भारतीय जनता पार्टी (भाजपा)मे शामिल भेलाक बाद मृत्युंजय तिवारी अपन पूर्व पार्टी राजद पर कड़ा हमला कयलनि। ओ भाजपा नेतृत्वक प्रति आभार व्यक्त करैत पार्टी द्वारा देल गेल सम्मानक पूर्ण निष्ठाक संग कायम रखबाक वचन देलनि। ओ कहलनि जे, हम भाजपाक प्रति आभार व्यक्त करैत छी, पार्टी हमरा पर जे भरोसा कयलक अछि ओकर हम अत्यंत ईमानदारीसँ सम्मान करब, हमर खूनक एक-एक बूंद भाजपा लेल समर्पित रहत। राजद मृत्युंजयकेँ 2014मे पैघ जिम्मेदारी सौंपलक। जनतब जे मृत्युंजय तिवारी बहुत दिनसँ राजद केर प्रमुख चेहरा रहल छलथि। इस्तीफा दैत ओ स्मरण कयलनि जे 2014मे जखन राजद कठिन चरणसँ गुजरैत छल तखन पार्टी अध्यक्ष लालू प्रसाद यादव हुनका राष्ट्रीय प्रवक्ता आ मीडिया प्रभारीक जिम्मेदारी सौंपने छलाह। ओ एहि कर्तव्यक निर्वहन अत्यंत ईमानदारीसँ करैत पार्टीक विचारधाराकेँ जनता धरि पहुँचेबाक काज करैत बतौलनि ।

हालक समयमे भाजपामे शामिल होमय वला लोकक संख्यामे लगातार बढ़ोतरी भ रहल अछि। एखन किछुए दिन पहिने ‘जन सूराज’ केर कतेको नेता पार्टीमे शामिल भ गेल छलाह, एहिमे शिक्षाविद के.सी. सिन्हा, रितेश रंजन उर्फ बिट्टू सिंह आ  सुधीर शर्मा जँका प्रमुख नाम शामिल अछि। एहीसँ पहिने राजद केर रितु जायसवाल सेहो बीजेपीमे शामिल भ चुकल छथि। आब मृत्युंजय तिवारी सेहो राजदकेँ छोड़िकय बीजेपीक दामन पकड़लथि।