वैशालीमे 8 सालक बच्चाक अपहरण-हत्याक सनसनीखेज खुलासा, ऑनलाइन गेमक कर्जसँ गेल मासूमक जान

पटना। समदिया

वैशाली जिलाक राघोपुर थाना क्षेत्रमे 8 वर्षीय मासूम अकुश कुमार केर अपहरणक बाद हत्याक सनसनीखेज मामिलाकेँ पुलिस खुलासा कय देलक अछि। पुलिस एही मामिलामें तीन आरोपीकेँ गिरफ्तार कयलक अछि। जांचमे सामने आयल अछि कि ऑनलाइन गेमक लत आ कर्जमे डूबल दू दोस्त फिरौतीक लेल बच्चाक अपहरण कयने छल। ओतय, शवक तलाशक लेल एसडीआरएफक टीम गंगा नदीमे लगातार सर्च ऑपरेशन चला रहल अछि।

पुलिसक मोताबिक, रामपुर श्यामचंद निवासी अनिल पंडितक 8 वर्षीय पुत्र अकुश कुमार घरसँ बाहर खेल रहल छल। दूपहरक समय ओ अचानक लापता भ गेल। काफी तलाशक बाद जखनि ओकर पता नहि चलल तँ परिजन अपहरणक आशंका जतबैत राघोपुर थानाकेँ सूचना देलक।

जांचमे सामने आयल की अपहरणकर्ता पहिने बच्चाकेँ मोटरसाइकिलसँ गांवक आसपास घुमौलाक आ फेर एक घरमे बंधक बना कय रखलक। एकर बाद ओ बच्चाक पिता अनिल पंडितकेँ वीडियो कॉल कयलक। पहिने 10 लाख रुपयाक फिरौती मांगल गेल आ किछु देर बाद कम घटाकय 5 लाख रुपया कय देल गेल। संग-संग पैसा नहि देला पर बच्चाक हत्याक धमकी सेहो देल गेल।

पुलिसक अनुसार, आरोपीकेँ जखने पुलिस जांचक जानकारी भेटल, ओ मासूमक हत्या कय देलक। एकर बाद शवकेँ कच्ची दरगाह सिक्स लेन पुलक 62 नंबर पाया लग गंगा नदीमे फेंक देलक। पुलिस घटनास्थलसँ बच्चाक चप्पल सेहो बरामद कयलक।

वैशालीक एसपी शुभांक मिश्रा प्रेस कॉन्फ्रेंसमे बतौलनि कि पूछताछक दौरान आरोपी खुलासा कयलक कि ओ ऑनलाइन गेम खेलय केर लत आ भारी कर्जमे फंसल छल। जल्दी पैसा कमाय केर लालचमे ओ बच्चाक अपहरण आ फिरौतीक पूरा साजिश रचलक।

पुलिस फिरौती मांगयमे इस्तेमाल कयल गेल मोबाइल फोन आ सिम कार्ड बरामद कय लेलक। जांचक दौरान एक अन्य आरोपीक नाम सेहो सामने आयल अछि, जाकर गिरफ्तारीक लेल लगातार छापेमारी कयल जा रहल अछि।

एसडीआरएफक टीम गंगा नदीमे मासूमक शवक तलाश कय रहल अछि। पुलिसक कहब अछि कि जल्द फरार आरोपीकेँ सेहो गिरफ्तार कय लेल जायत आ मामिलामे चार्जशीट दाखिल कयल जायत।

एसपी शुभांक मिश्रा कहलनि कि मामिलाक सफल उद्भेदन कय लेल गेल अछि। तीन आरोपीकेँ गिरफ्तार कयल जा चुकल अछि। फरार आरोपीक तलाश जारी अछि आ जल्द ओकरा सेहो गिरफ्तार कय लेल जायत। पुलिस पूरा मामिलामे आगुक कानूनी कार्यवाही कय रहल अछि।