कांग्रेसक पूर्व अध्यक्ष सोनिया गाँधी बुधदिन राजस्थानसँ राज्यसभाक लेल अपन नामांकन दाखिल कयलनि। नामांकन भरलाक बाद ओ रायबरेलीक जनताकेँ एकटा भावुक संदेश लिखने छथि। जकरा कांग्रेस पार्टी अपन आधिकारिक सोशल मीडिया प्लेटफॉर्म एक्स पर साझा कयलक अछि।
एहि पत्रमे सोनिया गाँधी लिखलनि, “दिल्लीमे हमर परिवार अधूरा अछि। ई रायबरेली आबि अहाँ सभमे मिलि पुरा होइत अछि। ई सम्बन्ध बहुत पुरान अछि आ हमरा अपन ससुरालसँ सौभाग्यक समान भेटल अछि। रायबरेलीक सङ्ग हमर परिवारक सम्बन्धक जड़ि बहुत गहिंरगर अछि। आजादीक बाद भेल पहिल लोकसभा चुनावमे अहाँ हमर ससुर फिरोज गाँधीजीकेँ एहिठामसँ जीता दिल्ली पठौलहुँ। ओकर बाद अहां हमर सास इंदिरा गाँधीकेँ अपन बना लेलहुं। तहियासँ ई चक्र जीवनक उतार-चढ़ाव आ मुश्किलसँ भरल बाट पर प्रेम आ अनुरागक सङ्ग चलैत रहल अछि आ एहि पर हमर विश्वास मजबूत होइत गेल अछि।
सोनिया गाँधी आगू लिखलनि, “अहाँ सेहो हमरा एहि रौशन राह पर चलबाक स्थान देलहुँ। सासु आ जीवनसाथीक बलिदानक बाद हम अहाँ लग अयलौंह आ अहाँ हमरा लेल अपन आंचर पसारि देलौंह।पिछला दू चुनावमे अहाँ प्रतिकूल परिस्थितिमे सेहो चट्टान जकाँ हमरा संग ठाढ़ छलहुं, हम ओ कहियो नहिं बिसरि सकैत छी। हमरा ई कहैत गर्व भऽ रहल अछि जे आइ हम जे किछु छी ओ अहाँक कारणे अछि आ हम एहि विश्वासकेँ कायम रखबाक भरिसक प्रयास कयलहुँ अछि।
अपन स्वास्थ्य आ वृद्धावस्थाक हवाला दैत सोनिया गाँधी कहलनि जे हम रायबरेलीसँ अगिला लोकसभा चुनाव नहिं लड़ब। एहि निर्णयक बाद हमरा सीधा अहाँक सेवा करबाक अवसर नहिं भेटत, मुदा ई निश्चित अछि जे हमर हृदय आ आत्मा सदैव अहाँक सङ्ग रहत। हम जनैत छी जे अहाँ हमरा आ हमर परिवारकेँ सेहो हर कठिनाईमे सम्हारब, जेना अहाँ एखन धरि सम्हारैत आबि रहल छी। एकर अतिरिक्त ओ रायबरेलीक लोकसँ जल्दिये भेँट करबाक वचन सेहो देलनि।
