बिहारमे राजदक उम्मीदवार द्विवार्षिक राज्यसभा चुनावक लेल बृहस्पतिकेँ अपन नामांकन पत्र दाखिल कयलनि। राजद उम्मीदवार मनोज कुमार झा आ संजय यादव बिहार विधानसभा सचिव सह निर्वाचन पदाधिकारी राज कुमारक समक्ष दू-दू सेटमे अपन-अपन नामांकन पत्र दाखिल कयलनि।
एहि अवसर पर लालू प्रसाद, पूर्व मुख्यमंत्री राबड़ी देवी, नेता प्रतिपक्ष तेजस्वी प्रसाद यादव, पूर्व मंत्री तेज प्रताप यादव सहित राजदक कतेको नेता उपस्थित छलाह।
नामांकन भरलाक बाद संजय यादव कहलनि जे ओ पार्टी नेतृत्व आ जनभावनाक अपेक्षा पर खरा उतरबाक प्रयास करताह। चुनौतीक बारेमे पूछला पर ओ कहलनि कि चुनौती तऽ रहिते छैक।
भाजपाक भीम सिंह आ धर्मशिला गुप्ता, जदयू केर संजय कुमार झा आ कांग्रेस उम्मीदवार अखिलेश प्रसाद सिंह बुधकेँ अपन नामांकन पत्र दाखिल कय चुकल छथि।
बिहारसँ राज्यसभाक छओ सीटक कार्यकाल समाप्त भऽ रहल अछि, जाहिमे जदयू आ राष्ट्रीय जनता दल (राजद)क दू-दू आ भाजपा आ कांग्रेसक एक-एक सीट अछि।
जाहि सांसदक कार्यकाल समाप्त होयत ओ छथि वशिष्ठ नारायण सिंह आ अनिल हेगड़े (जदयू), सुशील कुमार मोदी (भाजपा), मनोज कुमार झा आ अशफाक करीम (राजद) आ अखिलेश प्रसाद सिंह (कांग्रेस)।
