झारखंडक पूर्व मुख्यमंत्री हेमंत सोरेनकेँ ईडी रिमांड अवधि पूरा भेलाक बाद बृहस्पति दिन रांचीक होटवार स्थित बिरसा मुंडा सेंट्रल जेल भेज देल गेल।
एहिसँ पहिने हुनका लगभग २ बजे पीएमएलए अदालतमे पेश कयल गेल छल। पीएमएलए अदालत पहिने हुनका २२ फरवरी धरि न्यायिक हिरासतमे देने छल। ईडी सोरेनसँ लगातार तेरह दिन तक पूछताछ कयलक अछि।
३१ जनवरीक राति गिरफ्तार भेलाक बाद ईडी हुनका रिमांड पर लऽ लेलक आ ३ फरवरीसँ पूछताछ शुरू कयलक। अदालतक आदेश पर हुनकर रिमांड दू बेर बढ़ा देल गेल छल।
रांची के बरियातुमे साढ़े आठ एकड़ जमीन घोटालामे आठ घंटाक पूछताछक बाद हेमंत सोरेनकेँ ईडी ३१ जनवरी कऽ गिरफ्तार कयलक । हुनका एहि जमीनक स्वामित्व, दिल्लीक निवाससँ बीएमडब्ल्यू कारक बरामदगी, निकट विनोद सिंहक व्हाट्सएप चैटक विषयमे पूछताछ कयल गेल अछि।
ओना ईडी हेमंत सोरेन पर जांचमे सहयोग नहिं करबाक आरोप लगओलक अछि। जमीनक स्वामित्वक विषयमे पूछल गेल प्रश्नक उत्तरमे ओ एहि बातसँ इनकार कयलनि जे जमीन हुनक कब्जामे छल।
पीएमएलए अदालतमे पेशीक दौरान ईडी अदालतकेँ कहलक कि पूछताछक दौरान बड़गाई अंचलक राजस्व उपनिरीक्षक भानु प्रताप प्रसादक मोबाइलसँ भेटल ८.४६ एकड़ जमीनक सबूत हेमंत सोरेनक सामने राखल गेल छल।
