भारतीय कुश्ती महासंघ (डब्ल्यूएफआई)क निलंबित अध्यक्ष संजय सिंह भारतीय ओलंपिक संघ द्वारा गठित
एडहॉक कमेटी केर अस्वीकार कय देलनि अछि, ई सिंहक निकटतम सूत्र कहलक अछि। जानकारीक अनुसार खेल मंत्रीसँ एहि मुद्दापर संजय सिंह चर्चा करबाक योजना बना रहल छथि।
भारतीय ओलम्पिक संघ (आईओए) बुधदिन तीन सदस्यीय एडहॉक कमेटीक गठन कयलक, जकरा डब्ल्यूएफआईक दैनिक संचालनक देखरेखक काज सौंपल गेल।
एहि समितिक अध्यक्ष भूपिन्दर सिंह बाजवा भेलैथ, जे वुशु एसोसिएशन ऑफ इंडियामे अध्यक्षक पद सम्हारैत छथि। अन्य दूटा सदस्यमे हॉकीक ओलंपियन एमएम सोमाया आ पूर्व अंतर्राष्ट्रीय बैडमिंटन खिलाड़ी मंजूषा कंवर छथि।
खेल मंत्रालय २४ दिसम्बर कऽ अंडर १५ आ अंडर २० नेशन्लस केर आयोजित करय केर घोषणा पर चुनावक तीन दिनक बाद सिंहक नेतृत्ववाला नव डब्ल्यूएफआई संस्थाकेँ निलम्बित कऽ देलक।
केन्द्रीय खेल मंत्रालय पैनलकेँ निलम्बित करैत एहि निर्णयकेँ “जल्दबाजी” बतौलक आ कहलक जे ई निर्णय डब्ल्यूएफआई संविधानक प्रावधानक पालन कयने बिना लेल गेल छल।
सिंह, जे डब्ल्यूएफआई प्रमुख बृजभूषण शरण सिंहक निकटतम छथि। ओ दावा कयलनि जे खेल मंत्रालय द्वारा अपन पैनलक निलम्बनक विरुद्ध ओ कानूनी राय लेताह।
ओना, ओ इहो कहलनि जे कानूनी सलाह लेबासँ पहिने ओ केंद्र सरकारसँ गप्प करताह।
