झारखण्डमे चंपई सोरेन सरकार विधानसभामे विश्वास मत जीत लेलक अछि। राज्यपालक अभिभाषणक बाद भेल मतदानमे सरकारक पक्षमे ४७ मत पड़ल। ई संख्या विधानसभाक वर्तमान संख्या आ सदनमे उपस्थित विधायकक संख्याक अनुसार बहुमतक लेल आवश्यक संख्यासँ सात बेसी अछि।
मतदानसँ पहिने राज्यपालक लगभग ३५ मिनटक अभिभाषणक क्रममे कांग्रेस आ झामुमोक विधायक हेमन्त सोरेनक समर्थनमे लगातार नाराबाजी कयलनि। कांग्रेस विधायक प्रदीप यादव अपन संबोधन शुरू करबासँ पहिने आरोप लगओलनि जे झारखण्डमे जनताक निर्वाचित सरकारकेँ केन्द्र सरकारक इशारापर बेदखल कऽ देल गेल अछि।
पूर्व मुख्यमंत्री आ बरहेट विधानसभा क्षेत्रक विधायक हेमंत सोरेन सेहो मतदानक दौरान सदनमे उपस्थित छलाह। अध्यक्ष हुनका लेल सत्तारूढ़ दलक निर्दिष्ट स्थान पर अगिला पंक्तिमे एकटा सीट आवंटित कयने छलाह। अदालत हुनका एक घंटा धरि सदनमे उपस्थित रहबाक अनुमति देने छल। अदालत हुनका मीडियासँ गप्प नहिं करबाक आदेश देने छल।शक्ति परीक्षणक दौरान झामुमोक रामदास सोरेन गम्भीर रूपसँ बीमार हेबाक कारण सदनमे उपस्थित नहिं भऽ सकलाह। सत्तारूढ़ गठबन्धनक तीनटा विधायक सीता सोरेन, लोबिन हेम्ब्रम आ चमरा लिंडा जिनका नाराज कहल जाइत छल, ओ सेहो सरकारक पक्षमे मतदान कयलनि।
सत्तारूढ़ गठबन्धन विधायकसभकेँ एकजुट रखबाक लेल तीन दिन धरि हैदराबादक एकटा रिसॉर्टमे रखने छल। रविदिन साँझ सभटा विधायक हैदराबादसँ रांची वापिस अयलाह। सोमदिन सभ विधायक एक संग सदन पहुँचलाह।
विश्वास मत पर मतदान भेलाक बाद सदन मंगल दिन धरि स्थगित कऽ देल गेल। मंगल दिन सदनक दू दिवसीय विशेष सत्रक अंतिम दिन अछि।
