अधिकतर मिथिला क्षेत्र अर्थात उत्तर बिहारक जिलासभमे ठंढा पछुआ हवाक तेज झोंकाक कारण जाड़ कम नहिं भऽ रहल अछि। दिनमे रौद रहलाक बादो रौद नरम भऽ रहल अछि। मुदा आब मौसम विभाग अगिला चारि दिनमे जाड़सँ राहत भेटबाक संभावना व्यक्त कयलक अछि।
बिहारमे पिछला किछु दिनसँ मौसममे लगातार उतार-चढ़ाव देखल जा रहल अछि, जखन कि पछुआ हवासँ राज्यमे शीतलता बढ़ि गेल अछि। उत्तर बिहारक जिलासभमे ठंढा पछुआ हवाक तेज झोंकाक कारण जाड़ कम नहिं भऽ रहल अछि। दिनमे रौद रहलाक बादो रौद नरम भऽ रहल अछि। मुदा आब मौसम विभाग अगिला चारि दिनमे जाड़सँ राहत भेटबाक संभावना व्यक्त कयलक अछि। संगहि अधिकतम तापमान २२ डिग्री सेल्सियसकेँ पार करबाक सम्भावना अछि। मौसम विभागक अनुसार धीरे-धीरे ठंढासँ राहत भेटबाक सम्भावना अछि। अधिकतम तापमान २१.४ डिग्री सेल्सियस धरि बढ़ि गेल, जे सामान्यसँ ३.१ डिग्री कम छल।
बिहारक एहि १० जिलामे बरखाक संभावना अछि।
बसंत पंचमी अर्थात 13 फरवरीक ठीक पहिने पटना, भोजपुर, रोहतास, बक्सर, भभुआ, औरंगाबाद, अरवलक अलावा दक्षिण मध्य भागक गया, नालंदा, शेखपुरा, नवादा, बेगूसराय, लखीसराय, जहानाबादक एक-दू जगह पर हल्का बरखा होबए केर संभावना अछि।
संगहि जनतब ई जे न्यूनतम तापमान ६.९ डिग्री सेल्सियस दर्ज कयल गेल, जे सामान्यसँ ४.८ डिग्री कम सेहो कहल जा रहल अछि। डॉ. राजेन्द्र प्रसाद केन्द्रीय कृषि विश्वविद्यालयक वरिष्ठ मौसम विज्ञानी डॉ. ए सत्तार कहलनि जे अगिला पाँच दिन धरि उत्तर बिहारक जिलामे हल्लुक बादल देखल जा सकैत अछि। संगहि एहि दौरान तीनसँ पांच किलोमीटर प्रति घंटाक गतिसँ पछुआ हवा चलय केर संभावना अछि, जाहि कारण लोककेँ रौद रहबाक बावजूद हल्का गुलाबी ठंढा महसूस होएत। मौसम विभागक अनुसार, अगिला चारि दिनमे अधिकतम तापमान २२ सँ २४ डिग्रीक बीच आ न्यूनतम तापमान ११ सँ १४ डिग्री सेल्सियसक बीच रहबाक सम्भावना अछि। भोरमे सापेक्षिक आर्द्रता ८५ सँ ९० एवं दुपहरियामे ६० सँ ७० प्रतिशत रहत।
