एक बेर फेर बिहारमे राजनीतिक हलचल तेज अछि। कारण ई अछि जे मुख्यमंत्री नीतीश कुमारकेँ १२ फरवरीकेँ बहुमत साबित करय पड़त आ शक्ति परीक्षणसँ पहिने एनडीए आ महागठबंधन दुनू अपन विधायककेँ एकजुट रखबाक प्रयास कऽ रहल अछि। जेडीयू केर तरफसँ फ्लोर टेस्टसँ ठीक एक दिन पहिने पूर्व मंत्री श्रवण कुमारक आवास पर भोजक आयोजन कयल गेल छल, जाहिमे सीएम नीतीश जेडीयू विधायकक संग पहुंचलाह। दोसर दिस अपन विधायककेँ एकजुट रखबाक लेल राजद सेहो अपन विधायकक 3 बजे राबड़ी देवीक आवास पर बजौलक। कांग्रेस पहिनेसँ अपन विधायकसभकेँ हैदराबाद पठा देने छल।
जानकारीक अनुसार जेडीयू मंत्री विजय चौधरीक आवास पर विधायकक बैठक सेहो कयलक अछि, ओना सब दल आन दलमे टूट आ अपन पार्टीक विधायककेँ एकजुट करय केर दावा कऽ रहल अछि, मुदा फ्लोर टेस्टक बादे पता चलत जे कोन-कोन दलमे खेला भेल।
जदयू अध्यक्ष कहलनि अछि जे “१२ फरवरीकेँ मुख्यमंत्री नीतीश कुमार बिहार विधानसभामे शक्ति परीक्षण करताह। विपक्षकेँ बुझबाक चाही जे बिहारक मुख्यमंत्री नीतीश कुमारक नेतृत्वमे सरकार बनल अछि। ओ सभ सीधा हमर नेता आ हमर पार्टीसँ लड़ि नहिं सकैत छथि। हम हुनका सबकेँ मुंहतोड़ जवाब देब। हम सब एनडीएक संग छी।”
ओम्हर नीतीश कुमार श्रवण कुमार द्वारा आयोजित भोजमे भाग लेलनि मुदा पाँच मिनटक भीतर चलि गेलाह। नीतीश मीडियाक सवाल पर किछु नहिं कहलनि, बस मुस्कुराइत रहि गेलाह। सूत्रक अनुसार नीतीश कुमार छओ विधायककेँ भोजमे नहिं देखि नाराज छलाह। छओ विधायक छथि संजीव, गूंजेश्वर शाह, बीमा भारती, शालिनी मिश्रा, सुदर्शन कुमार। कहल जा रहल अछि जे किछु विधायक बीमार पड़ि गेल छथि आ किछु पारिवारिक कारणसँ भोजमे नहिं आयल रहथि। मुदा भोजमे विधायकक अनुपस्थितिक कारण राजनीतिक गलियारामे हलचल मचि गेल अछि। आब १२ फरवरी पर सभक दृष्टि।
