भारी बारिश आ तेज हवाक कारणे मुंबईमे रेड अलर्ट, 17 उड़ान रद्द

मुंबई। समदिया

महाराष्ट्रमे भारी वर्षा जारी अछि, जाहिसँ मुंबईमे दू बेर भूस्खलन भेल अछि। लोक मलबा केर नीचा फंसल छल। एनडीआरएफकेँ बचाव कार्य लेल तैनात कयल गेल अछि। मुंबई-पुणे एक्सप्रेसवे आओर पुरान हाईवे बंद भ गेल अछि। संगहि, भारी वर्षासँ कतेको ट्रेन रद्द कय देल गेल अछि। महाराष्ट्रक मंत्री गिरीश महाजन बतौलनि कि मुंबई, पालघर आ रायगढ़मे रिकॉर्ड तोड़ बारिश भेल अछि। जाहि कारण पिछला तीन- चारि दिनमे 13 लोकक मृत्यु भेल अछि।

गोंडिया जिलामे भारी वर्षा भेल अछि, जाहिमे सालेकसा, आमगांव आ देवरी तालुकामे सबसँ बेसी वर्षा भेल अछि। सालेकसा केर नदी आ धारमे बढ़ल पानी केर स्तर सामान्य जीवनमे बहुत बाधा पहुँचैल। पिपरिया-रिसेवाडा सड़क पर पुल बनेबाक दौरान अचानक जलस्तर बढ़लासँ एकटा टिपर ट्रक आ कतेको अन्य गाड़ी नदीमे फंसि गेल। समाचार सम्प्रेषण धरि सौभाग्यवश कोनो तरहक जानमालक नुकसानक खबरि नहि छल। प्रशासनक लोकसँ नदी वा धारक पार नहि करय केर अपील कयलक अछि आओर कमजोर इलाकामे रहय वला केर सतर्क रहय केर सलाह देलक अछि किएक तँ जलस्तर लगातार बढ़ि रहल अछि।

पुणे केर लोनावला लग इन्द्रायणी नदी भारी बरखाक बाद उमड़ि गेल अछि। पनवेल दिस डाउन हार्बर लाइन पर जीटीबी नगर स्टेशन लग गाछक डारि खसि पड़ल जाहिसँ ट्रेन सेवा बाधित भ गेल। सेंट्रल रेलवेक अनुसार 25 मिनटक भीतर पटरी साफ कय सेवा बहाल कय देल गेल, जकर बाद ट्रेनक परिचालन फेरसँ शुरू भ गेल।

महाराष्ट्र भाजपा अध्यक्ष अमित साटम कहलनि जे, आइ मुंबई लेल रेड अलर्ट जारी कएल गेल अछि आ शहरमे बहुत भारी वर्षा भ रहल अछि। आइ दुपहरमे सेहो समुद्रमे ज्वार (हाई टाइड) आयल। विधानसभामे माननीय मुख्यमंत्री पूरा राज्य आ मुंबईक लोकसँ अपील केलथि जे जखन एकदम जरूरी होय तखनहि घरसँ बाहर निकलथि आ अनावश्यक बाहर जायसँ बचथि। मुख्यमंत्री राज्य आपदा प्रबंधन कंट्रोल रूमसँ सभ एहतियाती उपाय आ व्यवस्थाक जायजा लेलनि। ओ अपने पूरा स्थिति पर नजरि रखने छथि। नगर निगमक प्रशासन मुंबईमे जमीनी स्तर पर मौजूद अछि आ सभ जरूरी कदम उठा रहल अछि। महाराष्ट्रक पुणे जिलामे भारी वर्षाक बाद मालवली गांवमे बाढ़ आबि गेल। पुणेमे भारी बारिशक कारण लोनावलामे कार्लासँ लोहागढ़ किला धरि जाय वला सड़कक एक हिस्सा पानीमे डूबि गेल अछि।

मुंबईक मरीन ड्राइव पर समंदरमे ऊंच लहर उठि रहल अछि, जे तटसँ काफी तेजीसँ टकरा रहल अछि।

अधिकारी कहलनि जे, सोमदिन भारी बरखाक बीच उत्तर मुंबईक मनोरी बीच लग करीब एक किलोमीटर दूर एकटा जहाज डूबि गेल। चट्टानी इलाका आ तेज हवाक कारण छोट-छोट नावकेँ बचाव अभियानक लेल मौका पर पहुंचनाय असुरक्षित भ गेल छल, ताहि लेल स्थानीय पुलिस भारतीय तटरक्षक बल (आईसीजी) केर सचेत कय देलक। गोराई थाना केर एगो अधिकारी बतैलनि कि फंसल जहाजक बारेमे जनतब भोरमे भेटल आ प्रोटोकॉलक अनुसार नौसेना, आईसीजी आ अन्य संबंधित समुद्री अधिकारीकेँ एही स्थितिक जानकारी देल गेल। ओ कहलनि, “जहाज मनोरी बीचसँ करीब एक किलोमीटर दूर लंगर लगाओल गेल अछि। जहाज लंगर लगा लेलक अछि आ कोनो अप्रिय घटनाक सूचना नहि भेटल अछि।”

अधिकारीक अनुसार शहरमे भारी वर्षाक कारण दुपहर 3:30 बजे धरि मुंबई पहुंचय वला पांच फ्लाइटकेँ दोसर हवाई अड्डा पर डायवर्ट कय देल गेल।

महाराष्ट्रक मुख्यमंत्री देवेन्द्र फडणवीस सचिवालयक आपदा नियंत्रण कक्षमे काल्हि बैसार कयलनि। आपदा राहत मंत्री गिरीश महाजन आओर वरिष्ठ अधिकारी सेहो मौजूद छलाह। मुख्यमंत्री कहलनि जे, “आइ दुपहर 3 बजे केर बाद मुंबईमे हाई टाइड होयत। हाई टाइडक दौरान जँ भारी बरखा होयत तँ पानि भरि सकैत अछि। दुपहरक बाद तेज हवाक संभावना अछि, जकर गति 60 सँ 70 किलोमीटर प्रति घंटा धरि पहुंचत। भूस्खलन वाल इलाकासँ लोककेँ बाहर निकालल गेल अछि।”

हवाई अड्डाक सूत्रक अनुसार काल्हि भोर 11:30 बजे धरि मुंबईक छत्रपति शिवाजी महाराज अंतरराष्ट्रीय हवाई अड्डा पर भारी वर्षाक कारण 17 उड़ान रद्द भ गेल छल आओर 217 उड़ानमे देरी भ गेल छल।

मुंबई आ आसपासक इलाकामे भारी वर्षा आ तेज हवाक चेतावनीक बीच सोमदिन महाराष्ट्र विधानसभा दिनभरि लेल स्थगित कय देल गेल।

जनतब दी जे सोमदिन भोरमे पुणे केर पाटनक एकटा छोट आ दूर गाममे भूस्खलन भेल जाहिसँ एकटा घर मलबामे दबि गेल। प्रारंभिक जानकारीसँ पता चलल जे घरमे रहय वला पूरा परिवार मलबाक नीचा फंसल भ सकैत अछि। समाचार सम्प्रेषण धरि बचाव कार्य चलि रहल छल। जिला सूचना कार्यालय पुणे केर अनुसार एखन धरि कोनो हताहतक आधिकारिक पुष्टि नहि भेल अछि। घटनाक बाद पुणे स्थित राष्ट्रीय आपदा प्रतिक्रिया बल (एनडीआरएफ) केर 5 बटालियनसँ मदति मांगल गेल। रिपोर्टक अनुसार 30 सदस्यीय टीमकेँ तैनात कयल गेल छल, जाहिमे एकटा अधिकारी, दूटा वरिष्ठ अधिकारी आ 27 कर्मी शामिल छल।

राज्यमे बारिशसँ जुड़ल मृत्यु पर कांग्रेस एमएलसी सतेज (बंटी) ज्ञानदेव पाटिल कहलनि कि आईएमडी एहन भारी वर्षाक संभावना जतौने छल, तँ की तैयारी कयल गेल? इ प्रशासनक पूरा नाकामी अछि, चाहे ओ म्युनिसिपल कॉर्पोरेशनक दिससँ होय वा सरकारक दिससँ। मुंबई एक इंटरनेशनल शहर अछि। दुनियाभरिमे एकर चर्चा होयत अछि, तइयो हम मुंबईकेँ बचा नहि पाबि रहल छी। ओ सरकार कोना चलौताह?