वीर कुंवर सिंहक कर्मभूमि जगदीशपुरक किला-संग्रहालयक भ्रमण कयलनि सीएम सम्राट

ओतय बाबू वीर कुंवर सिंहक 80 फीट ऊँच विशाल प्रतिमा स्थापित होयत

पटना । समदिया

मुख्यमंत्री सम्राट चौधरी बुधदिन भोजपुरक जगदीशपुर स्थित वीर कुंवर सिंह किला-संग्रहालयक भ्रमण केलनि। ओतय महान स्वतंत्रता सेनानी बाबू वीर कुंवर सिंहक प्रतिमापर माल्यार्पण कऽ श्रद्धांजलि अर्पित केलनि। एहि अवसरपर मुख्यमंत्री जगदीशपुरमे वीर कुंवर सिंहक 80 फीट ऊँच प्रतिमा स्थापित करबाक घोषणा केलनि।

झांझरिया पोखरिक सौंदर्यीकरणक बाद स्थापित होएत प्रतिमा

मुख्यमंत्री किला-संग्रहालयमे वीर कुंवर सिंहक जीवन, शौर्य, संघर्ष आ 1857क स्वतंत्रता संग्रामसँ जुड़ल ऐतिहासिक स्मृति, कलाकृति आ धरोहरक अवलोकन केलनि। किला परिसरमे किन्नर समुदाय द्वारा पारंपरिक रूपसँ आरती उतारि हुनकर स्वागत सेहो कएल गेल।

जानकारीक अनुसार, जगदीशपुरक झांझरिया पोखरिक सौंदर्यीकरणक बाद ओतय बाबू वीर कुंवर सिंहक 80 फीट ऊँच विशाल प्रतिमा स्थापित कएल जाएत। एहि माध्यमसँ नव पीढ़ीकेँ वीर कुंवर सिंहक शौर्य आ स्वतंत्रता संग्राममे हुनकर योगदानसँ परिचित करेबाक प्रयास होएत।

मुख्यमंत्रीक दौराक दौरान जगदीशपुर किलाकेँ पर्यटन स्थल रूपमे विकसित करबाक, जीर्णोद्धार-सौंदर्यीकरण आ पर्यटक सुविधाक विस्तार पर सेहो चर्चा भेल। ऐतिहासिक धरोहरक संरक्षण आ एकरा व्यापक रूपसँ लोक धरि पहुँचाबय पर जोर देल गेल।