राजद विधायक दलक बैसार शुरू भऽ गेल अछि। लालू यादव आ तेजस्वी यादव एहि सभाकेँ सम्बोधित कऽ रहल छथि। कहल जा रहल अछि जे एहि बैसारमे भाग लेनिहार सभ नेताक मोबाइल फोन बाहर राखल गेल अछि।
बिहारमे चलि रहल राजनीतिक उथल-पुथलक बीच राजद शनि दुपहरियासँ अपन विधायक दलक बैठक शुरू केलक अछि। ई बैसार उपमुख्यमंत्री तेजस्वी यादवक सरकारी आवास पर भऽ रहल अछि। एहि बैसारमे विधायक आ विधान परिषद सदस्य उपस्थित छथि।
सूत्रक अनुसार राजद विधायक दलक बैसार राज्यपालसँ भेंट कऽ नीतीश कुमारक नेतृत्ववला सरकारसँ समर्थन वापिस लेबाक पत्र देत। एकर बाद नीतीश कुमार सरकार अल्पमतमे आबि जायत आ ओकर बाद राजद अध्यक्षसँ भेंट कए नीतीश कुमारकेँ विधानसभामे बहुमत साबित करबाक चुनौती दऽ सकैत अछि।
सूत्रक ईहो कहब अछि जे नीतीश कुमार द्वारा गठबंधन छोड़ि भाजपाक संग जयबाक चर्चाक बीच लालू-तेजस्वी सेहो अपन स्तर पर समीकरण बैसाबय केर प्रयास कऽ रहल अछि।
बिहार विधानसभामे एखन भाजपाक ७८ सीट अछि, जखन कि जदयू लग ४५ विधायक अछि। ओतहि एनडीए के सहयोगी एचएएम के ४ विधायक अछि। जँ एहि सभकेँ जोड़ल जाय तखन ई आंकड़ा १२७ भऽ जाइत अछि। जे १२२ केर जादुई आंकड़ासँ बेसी अछि। जँ राजद जेडीयूक किछु विधायक तोड़ि दैत अछि तखन कांग्रेसक १० टा बागी विधायक नीतीश आ भाजपाक सरकार बनेबामे महत्वपूर्ण भूमिका निभा सकैत छथि।
ओतय राजदकेँ कांग्रेस आ वामपंथी दलक समर्थन पहिनहिंसँ अछि आ एहन स्थितिमे जँ ओ सरकार बनाबय चाहैत अछि त ओकरा ८ टा विधायकक जरूरत पड़त। एकरा लेल जीतन राम मांझीक पार्टी आ ओवैसी आ अन्य छोट दलक संग बातचीत कैल जा रहल अछि। मुदा, एचएएम लालूक प्रस्तावकेँ पूर्णतः अस्वीकार कऽ देलक आ कहलक जे हम जतए छी ओतहि रहब।
