बिहार सरकार एकटा पैघ प्रशासनिक फेरबदल करैत शुक्रदिन कतेको जिलाक पाँचटा डीएम आ एसपीक तबादला कऽ देलक। एकर संगहि बिहार प्रशासनिक सेवाक ४५ अधिकारीक तबादला सेहो कयल गेल।
बिहार सरकार पुलिस विभागमे पैघ प्रशासनिक फेरबदल कयलक अछि। सरकार शुक्रदिन देर राति ७९ आईपीएस अधिकारीक तबादला कयलक। एकरा संग कतेको जिलाक एसपी बदलि देल गेल अछि। प्राप्त जानकारी के अनुसार दरभंगा, जहानाबाद, नवगछिया, अररिया, सीवान, पूर्णिया, सहरसा, मुंगेर, मधेपुरा, शेखपुरा, बेगूसराय, खगड़िया, बगाहा, अरवल सहित कतेको जिलाक एसपी केर ट्रांसफर कएल गेल अछि। राजीव मिश्र पटनाक एसएसपी बनल रहताह। डीआईजीमे पदोन्नति भेलाक बादो एसएसपी पटनाक पोस्टिंग बरकरार राखल गेल अछि।
रोशन कुमारकेँ पटना ग्रामीणक एसपी, मुजफ्फरपुर शहरक अवधेश दीक्षित आ मिस्टर राज भागलपुर सिटी एसपी बनाओल गेल अछि। शुभम आर्यकेँ दरभंगाक नव एसपी नियुक्त कयल गेल अछि।
सामान्य प्रशासन विभाग द्वारा जारी अधिसूचनाक अनुसार २०१० बैचक आईएएस अधिकारी आ पटना जिला मजिस्ट्रेट चन्द्रशेखर सिंहक स्थानान्तरण कऽ मुख्यमंत्री सचिवालयमे विशेष सचिव नियुक्त कयल गेल अछि। सिंह हालहिमे शीतलहरकेँ देखैत पटनामे विद्यालय बन्द करबाक सम्बन्धमे राज्यक शिक्षा विभागक सङ्ग पत्राचारक लेल चर्चामे छलाह।
बिहार राज्य खाद्य आ नागरिक आपूर्ति निगममे मुख्य महाप्रबंधकक रूपमे तैनात २०११ बैचक आईएएस अधिकारी रजनीकान्तक स्थानान्तरण कऽ लखीसरायक जिला मजिस्ट्रेटक रूपमे नियुक्त कयल गेल अछि। १९९५ बैचक आईएएस अधिकारी आ वर्तमानमे वित्तक प्रधान सचिवक रूपमे तैनात अरविन्द कुमार चौधरीकेँ ग्रामीण विकास विभागक प्रधान सचिवक अतिरिक्त प्रभार देल गेल अछि। १९९६ बैचक आईएएस अधिकारी सेंथिल के कुमारकेँ योजना विभागक नव प्रधान सचिवक रूपमे तैनात कयल गेल अछि। वर्तमानमे ओ गृह विभागक प्रधान सचिवक रूपमे तैनात छथि।
