अयोध्यामे रामललाक आगमनक प्रतीक्षा समाप्त भऽ गेल। अभिजीत मुहूर्तमे रामललाकेँ प्राण प्रतिष्ठा कयल गेल। प्रधानमंत्री मोदी, आरएसएस प्रमुख मोहन भागवत, राज्यपाल आनंदीबेन पटेल आ उत्तर प्रदेशक मुख्यमंत्री योगी आदित्यनाथ रामललाक प्राण-प्रतिष्ठा लेल गर्भगृहमे उपस्थित छलाह।
प्रधानमंत्री नरेन्द्र मोदी चानीक छतरी लऽ कऽ राम मन्दिरक गर्भगृह पहुँचलाह। प्रधानमंत्री नरेन्द्र मोदी अयोध्यामे श्रीराम जन्मभूमि मन्दिरमे रामललाक प्रतिमाक अनावरण कयलनि। मंगल ध्वनिक बीच रामललाक अभिषेकक कार्यक्रम प्रारम्भ भेल।
रामललाक पाँच सालक बालरूपक भव्य पाँच फीट ऊँच प्रतिमाक अनावरण अन्ततः दुनियाक समक्ष कयल गेल।
मन्दिर पर फूलक वर्षा करैत हेलीकॉप्टरक आ शंखनादक बीच समारोह पूरा भेल।
रामललाक मूर्ति बनेनिहार मूर्तिकार योगीराज अरुण कहलनि, “हमरा लगैत अछि जे हम एहि पृथ्वीक सबसँ भाग्यशाली व्यक्ति छी। कखनहु-कखनहु हमरा लगैत अछि जे हम कोनो सपनाक दुनिया मे छी।*
राम मंदिर ट्रस्टक महासचिव कहलनि जे देश भरिक लोक राम मन्दिरक लेल उदारतापूर्वक दान देलनि। देशक कोनो एहन कोना नहिं अछि जतयसँ रामक लेल उपहार नहिं आयल अछि।
एकटा बानगी गिनबैत ओ कहलनि जे मन्दिरक घंटी कासगंजसँ आयल अछि, जखन कि राख रायबरेलीक ऊंचाहारसँ आयल अछि। गिट्टी मध्य प्रदेशक छतरपुरसँ आयल, ग्रेनाइट तेलंगानासँ आयल। पाथर राजस्थानक भरतपुरसँ आबि गेल आ केवारक लकड़ी महाराष्ट्रसँ आयल। ओहि केवारपर सोना आ हीराक काज मुंबईक एकटा व्यवसायीक अछि। जे एकरा बनौलनि ओ मैसूरक छथि। गरुड़क प्रतिमा राजस्थानक एकटा कलाकार द्वारा बनाओल गेल अछि। लकड़ीक कारीगर कन्याकुमारीक छथि आ कपड़ा आ भगवानक वस्त्र दिल्लीक एकटा युवक मनीष त्रिपाठी द्वारा बनाओल गेल अछि। गहना लखनऊसँ बनाओल गेल अछि। एहि केर नक्काशी राजस्थानमे भेल। देशक कोनो एहन कोना नहि अछि जतयसँ राम मंदिर लेल समर्पण नहिं आयल अछि।
