अयोध्यामे ‘प्राण प्रतिष्ठा’क बाद एकटा सार्वजनिक संबोधनमे प्रधानमंत्री नरेन्द्र मोदी कहलनि, “सियावर रामचन्द्र की जय… आइ हमर राम आबि गेलाह। प्रधानमंत्री नरेन्द्र मोदी कहलनि, “एहि पावन अवसर पर अहाँ सब समस्त देशवासीकेँ बहुत-बहुत बधाई। हम एखने गर्भगृहमे ऐश्वर्य चेतनाक साक्षी बनि अहां सबहक समक्ष उपस्थित भेलौंह अछि। कहय केर लेल बहुत किछु अछि मुदा कंठ अवरुद्ध अछि।
पीएम मोदी कहलनि कि ओहि कालखंडमे वियोग मात्र १४ सालक छल, एहि युगमे अयोध्या आ देशवासी सैकड़ो सालक वियोगक सामना कयलक अछि। हमर कतेको पीढ़ी वियोग सहलक अछि। राम भारतक आस्था छथि, राम भारतक आधार छथि, राम भारतक विचार छथि, राम भारतक विधान छथि, राम भारतक चेतना छथि, राम भारतक चिंतन छथि, राम भारतक प्रतिष्ठा छथि, राम भारतक प्रताप छथि, राम प्रभाव छथि, राम प्रवाह छथि, राम नेति सेहो छथि, राम नीति सेहो छथि, राम नित्यन्ता सेहो छथि, राम निरंतरता सेहो छथि, राम व्यापक छथि, विश्व छथि, विश्वात्मा छथि, एहि लेल जखन रामक प्रतीष्ठा होइत अछि तखन ओकर प्रभाव सदियों धरि नहिं रहैत अछि, बल्कि ओकर प्रभाव हजारो वर्ष धरि रहैत अछि।
पीएम मोदी कहलखनि, हमर रामलला आब टेंटमे नहिं रहताह, आब ओ दिव्य मंदिरमे रहताह। हमर दृढ़ विश्वास अछि जे देश आ दुनियाक कोन-कोनमे रामक भक्त सभकेँ जे एखनि घटित भेल अछि ओकर अनुभव भऽ रहल हेतनि। ई क्षण अलौकिक अछि, ई वातावरण, ई घड़ी हम सब पर भगवान श्रीरामक आशीर्वाद अछि।
मोदी कहलनि, “हम आइ भगवान श्रीरामसँ सेहो क्षमा मांगैत छी। हमर सभक मेहनत, त्याग आ तपस्यामे जरूर किछु कमी रहल होयत जे हम एतेक शताब्दी धरि ई काज नहि कऽ सकलहुँ। आइ ओ कमी पूरा भए गेल अछि। हमरा विश्वास अछि जे भगवान राम आइ निश्चित रूपसँ हमरा सभकेँ क्षमा करथिन।
