गयाजीमे छापेमारी, 50 लाखक नकली दवाइ बरामद, महिला सहित 2 गिरफ्तार

गयाजी। समदिया

गयाजीमे काल्हि सोमदिन भोरमे ड्रग विभाग पैघ कार्यवाही कयलक। शहरक पीपरपाती मोहल्लामे पूर्व सांसद रंजीत सिंहक मकानमे भोरे-भोर पुलिस द्वारा छापेमारी कयल गेल।  जनतब अछि जे पूर्व सांसद रंजीत सिंहक मकानमे रहि रहल किराएदारकेँ कमरामे ड्रग विभागक रेड भेल। छापेमारीमे करीब 50 लाख रुपया मूल्यक प्रतिबंधित दवा बरामद भेल।  कार्यवाही ड्रग विभाग आ पुलिसक संयुक्त टीम द्वारा कयल गेल।

एही मामिलामे एक महिला समेत नकली दवा कारोबारसँ जुड़ल विकास कुमारकेँ हिरासतमे लेल गेल। जनतब भेटल जे टीमकेँ गुप्त सूचना प्राप्त भेल छल, जाहि केर आधार पर छापेमारी कयल गेल। छापेमारीक दौरान भारी मात्रामे प्रतिबंधित आ संदिग्ध दवा बरामद भेल। पुलिस आ ड्रग विभागक दिससँ टीम पूरा मकानमे जांच-पड़ताल कय रहल छल। अधिकारी द्वारा बरामद दवा केर जांच सेहो कयल जा रहल छल। संगहि इहो पता लगाओल जा रहल अछि कि नकली दवा केर नेटवर्क कतय सँ कतय धरि पसरल अछि।

छापेमारी केर दौरान भारी मात्रामे नकली आ नशीली दवा केर संग दवा बनाबयमे इस्तेमाल होय वला कच्चा माल बरामद होयबाक सूचना अछि। कार्यवाहीसँ इलाकामे सनसनी पसरल अछि।

सूत्रक अनुसार भवनक नीचा पशुपालन आ मत्स्य विभागक कार्यालय संचालित होयत अछि, जखनि कि ऊपरी हिस्सामे ताला बंद कमरामे ई अवैध कारोबार चलाओल जा रहल छल। पुलिस आ ड्रग इंस्पेक्टरक टीमकेँ ओतयसँ दवा पैकिंगमे इस्तेमाल होय वला उपकरण आ कतेको संदिग्ध सामग्री सेहो भेटल अछि। कतेको थानाक पुलिस आ ड्रग विभागक टीम मौका पर जांच-पड़तालमे समाचार सम्प्रेषण धरि जुट छल आ मामिलाक जांच जारी छल। जांचक बाद नकली आ नशीली दवाकेँ नेटवर्कसँ जुड़ल पैघ खुलासा भ सकैत अछि।

सहायक औषधि नियंत्रक विजय कुमार बतौलनि कि गुप्त सूचनाक आधार पर छापेमारी कयल गेल, जाहिमे भारी मात्रामे नशासँ संबंधित दवा बरामद भेल अछि। प्रारंभिक पूछताछमे पकड़ल गेल अभियुक्त बतौलक अछि कि दवा देवघरसँ एतय स्टोर कयल जायत छल। ओ कहलनि कि जांच अखनि जारी अछि, ताहि लेल सभ नामक खुलासा नहि कयल जा सकैत अछि।

सूत्रक अनुसार, जांच एजेंसी ईहो पता लगाबयमे जुटल अछि कि एही अवैध दवा कारोबारक नेटवर्क गयाजी समेत अन्य जिला धरि पसरल अछि वा नहि। मामिलामे जल्द पैघ खुलासा होयबाक संभावना जताओल जा रहल  अछि। बताओल जा रहल अछि ई मकान पूर्व सांसद रंजीत सिंह उर्फ रंग सिंहक अछि, जे वर्ष 1980मे झारखंडक चतरासँ कांग्रेसक टिकट पर सांसद चुनल गेल छलथि। हुनक किछु वर्ष पहिने निधन भ चुकल अछि, हुनक घरमे आरोपित कारोबार कय रहल छल।