पूर्वी चंपारण, मधुबनी समेत बिहारक 5 जिलामे नव पुलिस कप्तान

पटना। समदिया

बिहार सरकारक गृह विभाग राज्यक पांच संवेदनशील जिलामे ग्रामीण पुलिस अधीक्षक (ग्रामीण एसपी) केर लेल पांच नव पदक सृजनकेँ हरी झंडी द देलक अछि, जकर उद्देश्य सुरक्षा व्यवस्थाकेँ आओर मजबूत करबाक अछि। सरकार केर मानब अछि कि ई नव वरिष्ठ स्तरक पदक शुरूआतसँ ग्रामीण क्षेत्रमे कानून व्यवस्थाकेँ बेसी प्रभावी निगरानीमे सुविधा होयत। ई फैसला एहन समयमे आयल अछि जखनि हालमे पटनाक रूपसपुर इलाकाक होटलमे बेगूसरायसँ परीक्षा देबय आयल एक पॉलिटेक्निक छात्रासँ बदसलूकीक घटनाकेँ बाद कानून व्यवस्था पर लगातार सवाल उठि रहल अछि।

गृह विभाग द्वारा जारी आधिकारिक पत्रक अनुसार, एही नव पद लेल मंजूरी भेटल जे पांच जिला, जे आपराधिक आ सांप्रदायिक दुनू दृष्टिकोणसँ बेहद संवेदनशील मानल जायत अछि जाहिमे पूर्वी चंपारण, समस्तीपुर, मधुबनी, वैशाली आ सिवान शामिल अछि। एहिमे सँ प्रत्येक जिलामे एकटा ग्रामीण एसपी तैनात होएत। इ सभटा पद बिहार पुलिस सेवाक स्टाफ ऑफिसर श्रेणीमे आओत।

एहीसँ पहिने बढ़ैत जनसंख्याकेँ ध्यानमें रखैत बिहार पुलिस सेवा संवर्ग केर भीतर 181 अतिरिक्त पद केर सृजन कयल गेल छल, जाहिसँ गया, रोहतास, मुजफ्फरपुर, पश्चिम चंपारण, सारण, दरभंगा, सहरसा, पूर्णिया, भागलपुर, मुंगेर आ बेगूसराय जँका जिलामे ग्रामीण एसपी पद स्थापित कयल गेल छल। आब एहि पहल केर  निरंतरतामे एहि पांचटा नव जिला कय सेहो एहि सूचीमे शामिल कयल गेल अछि।

सरकारक अवर सचिव इंदु भूषण सिंह द्वारा जारी आदेशमे कहल गेल अछि जे एहि पांच नव पदक सृजनसँ राज्यक खजानासँ ₹12,004,800 केर अनुमानित वार्षिक खर्च होयत। इ बजटीय आवंटनमे अधिकारीकें बेसिक वेतन (₹118,500), 58% (₹68,730)कें दरसँ महंगाई भत्ता (डीए) आ 10% (₹11,850)कें दरसँ मकान किराया भत्ता (एचआरए) शामिल अछि। एही प्रस्तावकेँ राज्य मंत्रिमंडलसँ मंजूरी भेंट चुकल अछि आ आब एकरा तत्काल प्रभावसँ लागू करय लेल अधिसूचना जारी कयल गेल अछि।