रूसमे भेल राष्ट्रपति चुनावमे व्लादिमीर पुतिन पैघ जीत हासिल कयलनि अछि, जकर बाद पुतिन पाँचम बेर रूसक राष्ट्रपति बनल छथि। सोमदिन परिणामक घोषणा भेलाक बाद अपन पहिल संबोधनमे पुतिन पश्चिमी देश सभकेँ धमकी दैत तृतीय विश्वयुद्धक चेतौनी दऽ देलनि। ओ कहलनि जे रूस आ अमेरिकाक नेतृत्ववाला नाटो गठबंधनक बीच जँ संघर्ष होइत अछि तऽ एकर अर्थ अछि जे ई दुनिया तृतीय विश्वयुद्धसँ मात्र एक डेग दूर होयत आ भरिसके कियो एहन स्थिति देखय चाहैत अछि।
१९६२ केर क्यूबा मिसाइल संकटक बाद रूस आ पश्चिमक बीच संबंध अपन सबसँ खराब दौरसँ गुजरि रहल अछि। फ्रांसक राष्ट्रपति इमैनुएल मैक्रां पछिले मास भविष्यमे यूक्रेनमे अपन सैनिक उतारबाक सम्भावनासँ इनकार नहिं कयलनि। एहि बारेमे पूछला पर पुतिन कहलनि कि ‘आजुक आधुनिक युगमे किछु संभव अछि, मुदा जँ ई होइत अछि तखन तेसर विश्वयुद्ध अधिक दुर नहिं अछि। पुतिन इहो कहलनि कि ‘यूक्रेनमे नाटोक सैनिक एखनो मौजूद अछि। रूसकेँ पता चलल अछि जे युद्धक मैदानमे अंग्रेजी आ फ्रांसीसी भाषी सैनिक सेहो उपस्थित छथि। ई नीक बात नहिं अछि, विशेष रूपसँ हुनका लोकनिक लेल किएक तँ ओ सभ एतय पैघ संख्यामे मरि रहल छथि।’
पुतिन फरवरी २०२२ मे यूक्रेन पर आक्रमण कयलनि। यूक्रेन युद्ध पर पुतिन कहलनि जे फ्रांस वार्तामे महत्वपूर्ण भूमिका निभा सकैत अछि किएक तँ एखन धरि सब समाप्त नहिं भेल अछि। पुतिन कहलखिन, “हम ई पहिने कहि चुकल छी, आ आबो कहैत छी, जे हम बातचीत करय लेल तैयार छी आ ई वार्ता मात्र एहि लेल नहिं होयत कि दुश्मन लग गोला-बारूद खतम भऽ गेल अछि, यदि ओ सभ वास्तवमे गंभीर छथि आ शान्ति चाहैत छथि तऽ हुनका पड़ोसी देश जकाँ नीक संबंध बनाबय पड़त।”
अमेरिका आ पश्चिमी देशसभ द्वारा रूसक चुनावक आलोचना कयलाक बाद पुतिन स्वयं अमेरिकी लोकतंत्रक मजाक उड़ाबैत कहलनि जे ‘पूरा दुनिया हुनका (अमेरिका) पर हँसि रहल अछि, ओतय की भऽ रहल अछि।’
पुतिन ट्रम्प पर पूरा स्टेट मशीनरीकेँ लगाबय केर आरोप सेहो लगओलनि। पुतिनक विरोधी मानल जायवला एलेक्सी नवलनीक मृत्युपर पुतिन पहिल बेर हुनक नामक उल्लेख करैत कहलनि जे आब ओ मरि चुकल छथि आ हुनक मृत्युपर शोक व्यक्त कयलनि। नवलनीक मृत्यु रूसक जेलमे संदिग्ध परिस्थितिमे भेल छल। नवलनीकेँ पुतिनक विरोधी मानल जाइत छल। पुतिने पर नवलनीक मृत्युक आरोप लागल छल।
