भारत-रूस रक्षा साझेदारीक नव अध्याय : नई दिल्लीमे सैन्य अधिकारीसभक महत्वपूर्ण बैठक

नई दिल्ली । समदिया

भारत आ रूसक बीच रक्षा सहयोगकेँ आओर सुदृढ़ बनेबाक उद्देश्यसँ नई दिल्लीमे 4 अगस्तसँ 7 अगस्त धरि भारत-रूस आर्मी ‘लैंड सिस्टम सब ग्रुप’ केर पाँचम बैठक आयोजित भऽ रहल अछि। एहि उच्चस्तरीय बैठकमे दुनू देशक वरिष्ठ सैन्य अधिकारी भविष्यक रक्षा सहयोग, संयुक्त उत्पादन आ आधुनिक सैन्य तकनीक पर विस्तृत विचार-विमर्श कऽ रहल छथि।

बैठकमे भारतक प्रतिनिधिमंडलक नेतृत्व उप सेना प्रमुख लेफ्टिनेंट जनरल राहुल आर. सिंह कऽ रहल छथि, जखनकि रूसक प्रतिनिधिमंडलक नेतृत्व मेजर जनरल अलेक्जेंडर तुफेकची कऽ रहल छथि।

भारतीय सेनाक अनुसार, ई बैठक भारत-रूस सैन्य आ सैन्य-तकनीकी सहयोग तंत्रक अंतर्गत आयोजित कएल जा रहल अछि। एहि मंच पर रक्षा परियोजना, सैन्य आधुनिकीकरण, संयुक्त अनुसंधान, रक्षा उत्पादन आ औद्योगिक सहयोगकेँ आगाँ बढ़ेबाक विषय पर नियमित संवाद होइत अछि।

भारत आ रूस दुनू देश रक्षा संबंधकेँ आओर गहिर बनाबऽ पर सहमत भेल छथि। विशेष रूपसँ भारतमे संयुक्त रूपेँ रक्षा उपकरण निर्माण बढ़ेबाक प्रयास पर जोर देल जा रहल अछि, जाहिसँ आत्मनिर्भर भारत अभियानकेँ बल भेटत आ देशक तकनीकी क्षमता सेहो बढ़त।

उल्लेखनीय अछि जे एहि वर्ष भारतक रक्षा मंत्री राजनाथ सिंह आ रूसक रक्षा मंत्री आंद्रेई बेलौसोव केर बीच शंघाई सहयोग संगठन> रक्षा मंत्री सम्मेलनक दौरान किर्गिस्तानक राजधानी बिश्केकमे महत्वपूर्ण भेंट भेल छल। ओहि भेंटमे दुनू देश रक्षा सहयोगकेँ नव गति देबाक प्रतिबद्धता दोहरौने छलाह।

भारत आ रूस दशकोँसँ रक्षा क्षेत्रमे भरोसेमंद साझेदार रहल छथि। भारतीय सशस्त्र बलमे प्रयुक्त अनेक प्रमुख लड़ाकू विमान, पनडुब्बी, मिसाइल प्रणाली आ अन्य रक्षा उपकरण रूसक सहयोगसँ विकसित अथवा प्राप्त भेल अछि। वर्तमान बैठककेँ दुनू देशक रणनीतिक रक्षा साझेदारीकेँ नव दिशा देबाक महत्वपूर्ण कदम मानल जा रहल अछि।