मिथिला क्षेत्रीय बिहारक खगड़ियामे एकटा पैघ सड़क दुर्घटनाक सूचना भेटल अछि। जानकारीक अनुसार, कार आ ट्रैक्टरक बीचक टक्करमे कतेको लोकक जान जयबाक सूचना अछि। दुर्घटनाक एकटा वीडियो सेहो सामने आयल अछि। मीडिया रिपोर्टक अनुसार, सभ मृतक एक्के क्षेत्रक निवासी छलाह आ बारातमे शामिल भेलाक बाद अपन घर घुरि रहल छलाह। मुदा हुनकर एसयूवी कार ट्रैक्टरसँ टकरा गेल। एहि मामिलामे बेसी विवरणक प्रतीक्षा अछि।
जानकारीक अनुसार एहि दुर्घटनाक संबंधमे पुलिससँ सेहो सूचना भेटल अछि। एखन धरि भेटल अपडेटक अनुसार खगड़ियामे भेल एहि सड़क दुर्घटनामे ७ गोटेक मृत्यु भऽ चुकल अछि। ई दुर्घटना जीप आ ट्रैक्टरक बीच भेल छल। एहि दुर्घटनामे छ: गोटे घायल भेल छथि।
एकटा वरिष्ठ अधिकारी बतौलनि जे ई दुर्घटना सोम कऽ भोरे लगभग ६.३० बजे पसराहा क्षेत्रमे एकटा पेट्रोल पम्पक लग भेल। जानकारीक अनुसार दुनू वाहन आमने-सामनेसँ आबि रहल छल आ एक दोसरसँ टकरा गेल।
अधिकारी बतौलनि जे जीपमे सवार लोक एकटा विवाह समारोहसँ घुरि रहल छलाह। दोसर दिस, ट्रैक्टर क्षमतासँ बेसी भरल छल। जे सभ जीपमे छलाह हुनक दुर्घटना स्थले पर मृत्यु भऽ गेल।
पुलिस अधिकारी बतौलनि जे सभटा घायलकेँ स्वास्थ्य केन्द्रमे भर्ती कयल गेल अछि। खगड़ियाक पुलिस अधीक्षक चंदन कुशवाहा सेहो एहि मामिला पर बयान जारी कयलनि अछि। ओ कहलनि जे वरिष्ठ पुलिस आ प्रशासनिक अधिकारी घटनास्थल पर पहुँचि गेल छथि आ मामिलाक जाँच कयल जा रहल अछि। शवकेँ पोस्टमार्टमक लेल भेज देल गेल अछि।
