प्रधानमंत्री मोदीक कश्मीर यात्रासँ पहिने सुरक्षा व्यवस्था दुरुस्त

श्रीनगर
*

सात मार्चकेँ प्रधानमंत्री नरेन्द्र मोदीक कश्मीर यात्राकेँ देखैत सुरक्षा बढ़ा देल गेल अछि।
५ अगस्त, २०१९ केँ अनुच्छेद ३७० हटलाक बाद पीएम मोदीक ई पहिल घाटी यात्रा होयत। अन्तिम बेर ओ फरवरी २०१९ मे घाटी गेल छलाह।

प्रधानमंत्री मोदी ७ मार्चकेँ घाटीमे कतेको विकास परियोजनाक उद्घाटन/शिलान्यास करयवाला छथि।
ओ किछु राष्ट्रीय योजनाक स्थानीय लाभार्थीसँ बातचीत करताह आ श्रीनगरक बख्शी स्टेडियममे आयोजित लगभग दू घंटाक कार्यक्रमक दौरान एकटा जनसभाकेँ सेहो सम्बोधित करताह।

श्रीनगर अन्तर्राष्ट्रीय हवाई अड्डा पहुँचलाक बाद प्रधानमंत्री मोदी हेलीकॉप्टरसँ सेनाक १५म कोरक बादामी बाग छावनी मुख्यालयक लेल उड़ान भरताह।

ओ कोर मुख्यालयक भीतर शहीद स्मारक पर पुष्पांजलि अर्पित करताह।
एकर बाद प्रधानमंत्री बादामी बाग छावनीसँ घाटीमे अपन मुख्य कार्यक्रम स्थल बख्शी स्टेडियम धरि जययताह।

कार्यक्रम स्थल पर त्रिस्तरीय सुरक्षा व्यवस्था कयल गेल अछि। बख्शी स्टेडियमक लगपासक सभटा ऊँच भवनकेँ सुरक्षा बल अपन कब्जामे लऽ लेलक अछि। स्टेडियमक लगपासक क्षेत्रक निगरानी ड्रोनसँ कयल जायत।
श्रीनगर शहरमे कतेको ठाम अस्थायी चेक-पोस्ट स्थापित कयल गेल अछि आ शहरक सभ प्रवेश आ निकास बिन्दुपर जाँच कयल जा रहल अछि।
स्टेडियमक भीतर प्रधानमंत्री आ आम जनताक सुरक्षा सुनिश्चित करबाक व्यवस्था सेहो कयल जा रहल अछि।

भाजपा नेतालोकनिकेँ आशा अछि जे ७ मार्चकेँ बख्शी स्टेडियममे आयोजित जनसभामे घाटीक विभिन्न भागसँ पैघ संख्यामे लोक भाग लेताह।