जनसंघक संस्थापक पंडित दीनदयाल उपाध्यायक पुण्य तिथि पर रविकेँ मोदी एक्स पर ट्वीट कयलनि, “पंडित दीनदयाल उपाध्याय जीक पुण्यतिथि पर देशभरिमे हमर परिवारक सदस्यक तरफसँ श्रद्धांजलि। ओ भारतीय संस्कृति आ धरोहरकेँ केन्द्रमे राखि देशकेँ आगू बढ़यबाक मार्ग देखौलनि, जे विकसित भारतक निर्माणमे प्रेरणा सेहो बनि गेल अछि।”
दीनदयाल उपाध्यायक पुण्यतिथिक बीच सोशल मीडिया पर पीएम मोदीक एकटा पुरान वीडियो वायरल भऽ रहल अछि जाहिमे ओ भाषण दैत लोकसभकेँ दीनदयाल उपाध्यायक सादगीक बारेमे बता रहल छथि। एकर सङ्गहि ओ पण्डित दीनदयाल उपाध्यायकेँ राष्ट्रपिता महात्मा गाँधीक उत्तराधिकारी बतौलनि।
जनतब जे ई वीडियो हुनकर भाषणक हिस्सा अछि जे ओ वर्ष २००३ मे देने छलथि, जखन नरेंद्र मोदी गुजरातक मुख्यमंत्री छलाह।
वायरल वीडियोमे नरेन्द्र मोदी पूर्व प्रधानमंत्री अटल बिहारी वाजपेयीक उल्लेख करैत कहि रहल छथि, “हम एक बेर अटल जीक मुँहसँ सुनलहुँ, पंडित जी दिल्लीक एकटा छोट झोपड़ीमे रहैत छलाह। हुनका सभसँ भेँट कयलापर ओ सभ फाटल धोती वा कुर्ताकेँ सुईक धागासँ सिबि रहल भेटलाह।
ओ आगू कहैत छथि जे पंडित जीक यात्रा सामग्रीमे दू जोड़ी धोती, दूटा कुर्ता आ सुई-धागाक पैकेट शामिल छल। इ हुनकर जीवनक सामान छल।
ई वीडियो मोदी आर्काइवक ट्विटर हैंडल द्वारा साझा कयल गेल अछि।
प्रधानमंत्री बनलाक बादसँ नरेन्द्र मोदी दीनदयाल उपाध्यायक नीतिसभकेँ प्रेरणाक स्रोत मानैत आगू बढ़ा रहल छथि। मोदी सरकार द्वारा जारी कयल गेल सभ योजना हुनक विचार पर केन्द्रित प्रतीत होइत अछि, जाहिमे गरीबक हितमे पक्का घर, मुफ्त स्वास्थ्य सेवा, मुफ्त राशन सहित कतेको योजना जमीनी स्तर पर लागू कयल गेल अछि। एतबे नहिं, पीएम मोदी एखनो अपन भाषणमे अक्सर जनसंघक संस्थापक पंडित दीनदयाल उपाध्यायक उल्लेख करैत रहैत छथि।
