निलगाइक उपद्रवसँ किसान त्रस्त

समस्तीपुर समदिया
*

सरायरंजन प्रखण्ड अन्तर्गत मधुवन झखड़ा गामक किसान सभ अपन उपजल चास धञ्छ भेलासँ बहुत दुखी आ चिंतित अछि। एना लगै छै जेना कोनो भारी आफद आबि गेल होई जनतब दैत चली जे एहि ठामक किसान मुख्यरूपसँ तमाकू आ तरकारीक खेती करैत अछि। एहि क्षेत्रमे अचानक कतौसँ बीस-पचीसक संख्यामे निलगाइ आबि गेलैक, जे कि उपजल चासकेँ धाङि क’ नष्ट क’ रहल छैक। ग्रामीण द्वारा रोमला पर आओर तीव्र गतिसँ घोड़दौड़ करे लगैत छैक जाहिसँ तमाकुलक तुन्नुक पात टून द’ टूटि जाइत छैक। आइ धरि लगभग पचास बिघाक फसिल नष्ट भ’ चुकल अछि, जकर अनुमानित मुल्य साठिसँ सत्तरि लाख धरि बताओल जा रहल अछि। बिकाएल चास खराप भ’ गेलाक कारणे बेपारिओ सभ देल बेआना छोड़ि दैत छैक। तैँ किसान सभ त्राहि- त्राहि क’ रहल छैक। किसानसँ गप भेलापर जनतब भेटल जे ओ सभ करजा काढ़ि क’ खेती कएने छल। केओ केसीसी त’ केओ समूह लोन लेने अछि। किछु किसान त’ गहन- गुड़िआ आदि बन्हकी राखि खेती कएने छल। एहन विकट परिस्थितिमे किसान सभ सरकारी पदाधिकारीसँ प्रशासकीय सहजोगक आशमे टकटकी लगौने अछि। संगहि बिहार सरकारसँ फसिल छति आपूर्तिक गोहार क’ रहल अछि। जौँ लगले जिला प्रशासन कोनो समुचित निर्णय नहिं लेत त’ आमजन अपसेआंत भ’ जाएत आ किसान सभ खेतीसँ विमुख भ’ परदेसक बाट ध’ लेत। कतेको किसानक बेटीक बिआहक देखासुनी भेल छैक, नेना सभक पढ़ाइ लिखाइ आदि-आदि आब ठमकबाक संभावना बनि रहल छैक।