प्रशांत किशोरक कांग्रेसी विचारधारासँ मेलवाला दाँव
पटना
*
चुनावी रणनीतिकार आ जन सुराजक प्रमुख प्रशांत किशोर उर्फ पीके अपन राजनीतिक विचारधारा केर कांग्रेसक नजदीक बताक’ सियासतमे बड़का मोड़ दऽ देलैथ अछि। प्रशांत किशोर एकटा निजी टीवी चैनलसँ गपसप मे साफ जेकाँ कहलैथ, “हम कांग्रेस विचारधाराक नजदीक छी। हम कांग्रेसक संग जा सकैत छी। आब ई कांग्रेस के तय कर’ पड़त।” दोसर तरफ कांग्रेसक दिससँ सेहो प्रशांत किशोरक अहि कथनके स्वागत कयल गेल अछि। मुदा एकर संगहि प्रशांत किशोरक घुमाउदार राजनीति केर ल’क’ सेहो प्रश्न ठाढ़ भ’ रहल अछि। कि सहीमे प्रशांत किशोरक झुकाव कांग्रेस दिसि अछि ?
दरअसल, प्रशांत किशोरक राजनीतिक विचारधारा केर ल’क’ कतेक बेर प्रश्न ठाढ़ होइत रहल अछि, कियैक तऽ प्रायः ओ प्रधानमंत्री नरेंद्र मोदी केर प्रशंसामे गुणगान करैत छथि आ हुनक कार्यशैली केर प्रशंसा करैत रहैत छथि। कतेक बेर एहनो देखल गेल अछि जे ओ बिहारक मुख्यमंत्री नीतीश कुमारक कटु आलोचकक रूपमे सोंझा अयलैथ अछि, आओर लालू यादवक बेटा उपमुख्यमंत्री तेजस्वी यादवकेँ अपन निसाना पर लैत रहलैथ अछि। सभसँ खास बात ई जे नीतीशक संग प्रशांत किशोरक निसाना पर कांग्रेसक नेता राहुल गांधी सेहो रहलैथ अछि आओर ओ हुनकर खिद्धांस करैत रहलैथ अछि।
आब प्रश्न उठैत अछि जे की राहुल गांधी केर खिद्धांस करैबला कोनो लोक कांग्रेसक नजदीक भ’ सकैत अछि ? मुदा प्रश्न एतय दोसर अछि। दरअसल, पीके कांग्रेस दलक नजदीकी नञि भ’क’ ओ स्वयंकेँ कांग्रेसक विचारधाराक नजदीक बतौलैथ अछि। मतलब साफ अछि जे अपन ई कथनक मार्फत ओ भाजपासँ दूरी रखैबला नेताके रूपमे देखाय लेल चाहैत छथि आओर गांधीवादी विचारधाराकेँ दमपर अपन राजनीति आगू बढाब’ चाहैत छथि। बता दीअ जे पछिला बरख २ अक्टूम्बरसँ ओ जखनि जन सुराज यात्रा अभियानक आरम्भ कयलैथ तऽ चंपारणमे भीतिहरवा आश्रम, जे महात्मा गांधी केर कर्मस्थल रहल अछि, ओतहिसँ अपन पदयात्रा आरम्भ कयने छलैथ।
वरिष्ठ पत्रकार अशोक शर्मा कहैत छथि जे सरसरी रूपसँ देखब त प्रशांत किशोरक राजनीतिमे एहि तरहक दुविधा सेहो देखाई पड़त। मुदा, दोसर दिस अहाँ गहींरताइसँ देखब तऽ अहाँके हुनकामे एकदमसँ सधल रणनीति देखाइ पड़त। दरअसल, प्रशांत किशोर अपन पहचान गांधीवादी विचारधारा मानैबला नेताके रूपमे स्थापित करय चाहैत अछि। एना अहिनो जे कियैक तऽ कांग्रेसक दावा अछि जे असलमे कांग्रेस दलहिं गाँधीवादी विचारधारा के ल’क’ चलैत अछि आओर सर्वधर्म समभाव केर बात करैत अछि। प्रशांत किशोर अपन राजनीति अही लीकपर आगू बढ़ाब’ चाहैत छथि।एकर भीतरका रणनीति ई अछि जे ओ गांधीवादी विचारधाराक नामक संग मुसलमान सभकेँ अपन दिसि कर’ चाहैत छथि।
अशोक शर्मा कहैत छथि दरअसल कांग्रेसक दिस मुस्लिम जनता केर रुझान स्वभाविक रूपमे रहैत अछि आओर ई बात हालक कर्नाटक चुनावमे सेहो साबित भेल अछि। एहनमे प्रशांत किशोर केर ई कथन सोचि समझि क’ देल गेल कथन अछि आओर अहिमे कतहु कोनो दुविधा नञि अछि। दरअसल, बोर्डर कातक आ चंपारण केर इलाकामे मुसलमान सबहक संख्या बड्ड बेसी अछि आओर बोर्डर कातमे असदुद्दीन ओवैसी अपन पकड़ गहींरधरि बना लेलैथ अछि। दोसर ई अछि जे ओत’के छिरियाएल बला मुसलमानक मतपर राजद केर सेहो दावेदारी अछि। मुदा, चंपारण आ तिरहुतक इलाकामे लगातार दौरा क’ रहल प्रशांत किशोर मुसलमानक जन-मानसकेँ अपना तरफ कर’ चाहैत छथि।
