सम्राट चौधरी भड़कलाह लालू यादवक बयान पर

पटना

*

एक दिस बिहारक राजनीति दिन-प्रतिदिन गर्म होइत जा रहल अछि, दोसर दिस दिल्ली रवाना होएसँ पहिने राजद सुप्रीमो लालू प्रसाद द्वारा देल गेल बयान पर बिहारमे राजनीतिक युद्ध शुरू भऽ गेल अछि। इंडिया एलायंसक बैसारमे भाग लेबय जा रहल लालू यादव कहलनि अछि, “हम नरेन्द्र मोदीकेँ उखाड़य लेल जा रहल छी।” लालू यादवक एहि बयान पर भाजपाक प्रदेश अध्यक्ष सम्राट चौधरी कहलाह ‘पाँच राज्यक चुनावमे इंडी गठबन्धनक की हाल भेल अछि ? ओ पूरा देश जानैत अछि।”

ओ आगू कहलनि, “लालू यादव बिहारमे आपराधिक छविक चेहरा छथि, जकरा जेडीयू नेता साबित कए देने छथि जे ओ अपराधी छविक छथि, चारा चोरी करय वाला लोक की कहताह। लालू प्रसाद यादवकेँ बिहारक राजनीति मे कांग्रेस आ जेडीयू साफ कऽ देने अछि, एकटा तऽ अध्यादेश फाड़ि हिनका जेलमे सड़ा देलक अछि। कोनो हालतमे भाजपा आ एनडीए बिहारक ४० सीटमे सँ ४० सीट जीतत।”

संगहि सम्राट चौधरी फेरसँ इंडिया एलायंसक बैसारक बारेमे सेहो कहलनि, “हम सभ सोचने छलहुं जे नीतीश कुमार हमराहभकेँ छोड़ि भगलाह तऽ भरिसक प्रधानमंत्री पदक उम्मीदवार भऽ जयताह। हम बिहारी छी, हम सोचलहुं जे जँ नीतीश कुमार चलि जयताह तऽ ओ प्रधानमंत्री बनि जयताह, मुदा हुनक की हाल कयलक ओ सब से पूरा देश जनलक अछि। आइ नीतीश बाबू सबके सामने जे कहि रहल छथि, पूरा देश देखलक जे हुनकर भाषा केहेन अंड-बंड अछि, हम बुझि गेल छी जे इंडिया एलायंसक लोक नीतीश कुमारक की हाल कय देने अछि।” ओ आगू नीतीशकेँ प्रधानमंत्रीक उम्मीदवारक माँगक विषयमे कहलनि, “ई जनता तय करैत अछि जे की होयत?”