‘सेमीकॉन इंडिया 2026 केर उद्घाटन 17 सितम्बरकेँ करताह पीएम मोदी
नई दिल्ली । समदिया
प्रधानमंत्री नरेंद्र मोदी 17 सितंबरकेँ राष्ट्रीय राजधानीमे सेमीकॉन इंडिया 2026 केर पाँचम संस्करणक उद्घाटन करताह। तीन दिन धरि चलऽवला ई सम्मेलन आ प्रदर्शनी 17 सँ 19 सितंबर धरि आयोजित होएत। एहिसँ भारतक सेमीकंडक्टर इकोसिस्टमकेँ बेसी मजबूती भेटबाक उम्मीद अछि।
इलेक्ट्रॉनिक्स आ सूचना प्रौद्योगिकी मंत्रालयक अधीन इंडिया सेमीकंडक्टर मिशन (आईएसएम) आ ग्लोबल इंडस्ट्री एसोसिएशन एसईएमआईक संयुक्त आयोजनमे ई कार्यक्रम होएत। एहि बेर सम्मेलनक विषय ‘सिलिकॉन टू सिस्टम्स : बिल्डिंग द इकोसिस्टम’ राखल गेल अछि।
सम्मेलनमे नीति-निर्माता, वैश्विक सेमीकंडक्टर कंपनीक प्रतिनिधि, उद्योग जगतक अधिकारी, शोधकर्ता, शिक्षाविद्, स्टार्ट-अप, छात्र आ अन्य विशेषज्ञ सहभागी होएत। एहि दौरान सेमीकंडक्टर आ इलेक्ट्रॉनिक्स वैल्यू चेनमे भऽ रहल विकास पर विस्तारसँ चर्चा होएत।
सेमीकॉन 2.0 सँ बढ़त क्षमता
केंद्र सरकार हालहिमे देशक सेमीकंडक्टर निर्माण आ सप्लाई-चेन क्षमताकेँ मजबूत करबाक लेल ‘सेमीकॉन 2.0’ क’ मंजूरी देने अछि। सरकार 332 सँ बेसी शैक्षणिक संस्थान आ 105 स्टार्ट-अपकेँ उन्नत डिजाइन टूल उपलब्ध करा कऽ सेमीकंडक्टर रिसर्च, इनोवेशन आ डिजाइनकेँ बढ़ावा दऽ रहल अछि।
डिजाइन लिंक्ड इंसेंटिव (डीएलआई) योजनाक तहत 24 स्टार्ट-अपकेँ सेहो मंजूरी भेटल अछि। सेमीकॉन इंडिया कार्यक्रमक अंतर्गत घरेलू सेमीकंडक्टर इकोसिस्टम विकसित करबाक लेल सेमीकॉन 1.0 क’ तहत 12 परियोजनाकेँ मंजूरी देल गेल अछि।
इलेक्ट्रॉनिक्स आ सूचना प्रौद्योगिकी मंत्रालयक सचिव एस. कृष्णन कहलनि जे सेमीकॉन इंडिया 2026 भारतक सेमीकंडक्टर यात्रामे महत्वपूर्ण पड़ाव अछि। हुनका अनुसार, सेमीकॉन 1.0 क’ तहत स्वीकृत 12 परियोजनामे सँ तीन परियोजनामे व्यावसायिक उत्पादन शुरू भऽ गेल अछि।
ओ कहलनि जे छह प्रमुख स्तंभ पर आधारित सेमीकॉन 2.0 भारतमे मजबूत आ टिकाऊ सेमीकंडक्टर इकोसिस्टम बनयबाक संकल्पकेँ बेसी मजबूत करैत अछि।
500 सँ बेसी प्रदर्शक होएत सहभागी
आयोजकक अनुसार, प्रदर्शनीमे 500 सँ बेसी प्रदर्शक सहभागी होबाक संभावना अछि। एहिमे 240 सँ बेसी अंतरराष्ट्रीय कंपनी आ 40 सँ बेसी देशक प्रतिनिधिमंडल शामिल रहत।
कार्यक्रममे छह देशक पवेलियन, 10 राज्य सरकारक पवेलियन, स्टार्ट-अप पवेलियन, इनोवेशन शोकेस, स्टार्ट-अप पिच प्रतियोगिता, स्टूडेंट हैकाथॉन आ वर्कफोर्स डेवलपमेंट पवेलियन सेहो आकर्षणक केंद्र रहत।
एसईएमआईक अध्यक्ष आ सीईओ अजीत मनोचाक अनुसार, प्रतिभाशाली मानव संसाधन, नीतिगत सहयोग आ दीर्घकालीन दृष्टिकोणक कारण भारत वैश्विक सेमीकंडक्टर उद्योगमे अपन भूमिका बढ़ेबाक लेल मजबूत स्थितिमे अछि। आयोजनकेँ उद्योग जगत, नीति-निर्माता, निवेशक आ शोधकर्ताक बीच सहयोग बढ़ेबाक महत्वपूर्ण मंच मानल जा रहल अछि।
