बिहार निवेशक शिखर सम्मेलनमे 300 कंपनीक संग 50,530 करोड़ रुपयाक समझौता ज्ञापन पर हस्ताक्षर

पटना

*

कहलख अडाणी एंटरप्राइजेजक निदेशक प्रणव अडानी “हमर समूह बिहारमे सीमेंट विनिर्माण, लाॅजिस्टिक आ कृषि उद्योग सहित विभिन्न क्षेत्रमे 8,700 करोड़ टाका निवेश करबाक निर्णय लेलक अछि। एहिसँ राज्यमे लगभग दस हजार लोककेँ प्रत्यक्ष वा अप्रत्यक्ष रोजगार भेटत।

पटनामे बृहस्पति दिन संपन्न भेल दू दिवसीय वैश्विक निवेशक शिखर सम्मेलन “बिहार बिजनेस कनेक्ट-2023” केर दौरान विभिन्न क्षेत्रक लगभग 300 कंपनीक संग 50,530 करोड़ रुपयाक समझौता ज्ञापन (एमओयू) पर हस्ताक्षर भेल।

प्रणव अडाणी आगू कहलनि जे हुनकर कंपनी एतय पहिनेसँ ८५० करोड़ टाकाक निवेश कऽ चुकल अछि।

सम्मेलनक दौरान हस्ताक्षरित अन्य एमओयू मे 7,386.15 करोड़ रुपया भारत पेट्रोलियम कॉर्पोरेशन लिमिटेड, 5,230 करोड़ रुपया पटेल एग्री इंडस्ट्रीज प्राइवेट लिमिटेड, 2,200 करोड़ रुपया एमओयू होल्टेक इंटरनेशनल इंक, 2,000 करोड़ रुपया इंडो यूरोपियन हार्ट हॉस्पिटल्स एंड रिसर्च इंस्टीट्यूट प्राइवेट लिमिटेड, 1,600 करोड़ रुपया देव इंडिया प्रोजेक्टक समझौता ज्ञापन शामिल छल। एहिमे 1,000 करोड़ टाकाक स्टार सीमेंट, 1,000 करोड़ टाकाक अल्ट्राटेक सीमेंट, 1,000 करोड़ रुपयाक जेके लक्ष्मी सीमेंट, 800 करोड़ रुपयाक स्प्रे इंजीनियरिंग डिवाइसेज लिमिटेड, 674 करोड़ रुपयाक वरुण बेवरेजेज, 650 करोड़ रुपैयाक श्री सीमेंट आदि शामिल ।

शिखर सम्मेलनक समापन दिन बिहारक मुख्यमंत्री नीतीश कुमार सेहो उपस्थित छलाह। यद्यपि ओ सम्बोधित नहिं कयलनि, मुदा ओ “बिहार रसद नीति-२०२३” आ “कॉफी टेबल बुक (राज्य उद्योग विभागक)” केर विमोचन कयलनि।

एहि नीतिक उद्देश्य औद्योगिक आ सामाजिक विकासक लेल अन्तर्राष्ट्रीय स्तरक बुनियादी ढाँचा प्रदान केनाइ अछि।

सम्मेलनक समापन सत्रकेँ सम्बोधित करैत बिहारक उद्योग मंत्री समीर कुमार महासेठ कहलनि, “बिहार प्रगति कऽ रहल अछि। जँ तीनटा आओर चीज जोड़ल जायत तखन राज्यक विकास चारि गुना होयत। नेपालमे बरखा बिहारमे बहुत विनाशक कारण बनैत अछि। अगर जल प्रबंधन पर नेपालक संग समझौता होएत त बिहार के बाढ़ि आपदासँ बचायल जा सकैत अछि। जँ बिहारकेँ विशेष दर्जा भेटत तखन एहिठामक औद्योगिक विकासमे आओर तेजी आओत। तेसर महत्वपूर्ण बात ई अछि जे जँ बिहारकेँ विशेष आर्थिक क्षेत्रमे शामिल कयल जायत तँ ओकर आर्थिक विकास तेजीसँ होयत।

ओ कहलनि जे बिहार बिजली, पानि आ सड़कक क्षेत्रमे तेजीसँ प्रगति कयलक अछि जाहिसँ ई निवेशक लेल आदर्श स्थान बनि गेल अछि। बिहार बिजनेस कनेक्ट-2023 राज्यक औद्योगिक विकासमे मील क पत्थर साबित होयत।

अदानी एंटरप्राइजेजक निदेशक प्रणव अदानी सेहो बिहार सरकारक विकासात्मक आ सामाजिक योजनाक सराहना कयलनि। ओ कहलनि, “जखन नीतीश कुमार रेल मंत्री छलाह तखन ओ २००३ मे इंटरनेट आधारित रेलवे टिकट बुकिंग शुरू कयलनि। आइ ई सेवा दुनियाक सबसँ व्यस्त रेल टिकट बुकिंग प्रणाली अछि। एहि अवसर पर उद्योग विभागक अपर मुख्य सचिव संदीप पौंड्रिक राज्यक आर्थिक एवं औद्योगिक प्रगति पर प्रकाश देलनि। ओ कहलनि बाजार, कच्चा माल, बुनियादी ढ़ांचा, कार्यबल आ सरकारी समर्थनक कारण बिहारमे उद्योग स्थापित करब बहुत आसान अछि।